ហេតុការណ៍ផ្ទុះរថយន្តមួយកើតឡើងនៅទីក្រុង Afrin ក្នុងខេត្ត Aleppo ភាគខាងជើងនៃប្រទេសស៊ីរ៉ីបណ្តាលឲ្យជនស៊ីវិលចំនួន១នាក់រងរបួស។ សូមបញ្ជាក់ផងដែរថា នៅទីក្រុង Afrin ជាតំបន់ដែលស្ថិតនៅក្រោមការកាន់កាប់របស់កងកម្លាំងតួកគី និងអង្គការភេរវករដែលមានទំនាក់ទំនងជាមួយកម្លាំងតួកគី។
ប្រភពព័ត៌មានក្នុងស្រុកប្រាប់ភ្នាក់ងារព័ត៌មាន SANA ថា ហេតុការណ៍នោះកើតឡើងនៅពេលដែលមានរថយន្តមួយកំពុងតែធ្វើដំណើរឆ្លងកាត់លើផ្លូវ al-Siyasa ក្នុងទីក្រុង Afrinបណ្តាលឱ្យអ្នកបើកបររងរបួស និងបណ្តាលឲ្យមានការខូចខាតសម្ភារៈនៅទីតាំងកើតហេតុនោះផងដែរ។
សូមបញ្ជាក់ផងដែរថា ចាប់តាំងពីតំបន់នោះស្ថិតនៅក្រោមការកាន់កាប់របស់កងកម្លាំងរបបតួកគីដែលសហការជាមួយអង្គការភេរវករនៅខែមីនា ឆ្នាំ២០១៨មក ទីក្រុង Afrin និងតំបន់ផ្សេងទៀតដែលមានវត្តមានរបស់សមាជិកក្រុមទាំងនេះបានកើតភាពវឹកវរ ជម្លោះ អសន្តិសុខ និងការបង្ហូរឈាម ជាពិសេសកើតមានជម្លោះនៅក្នុងចំណោមសមាជិករបស់ក្រុមទាំងនេះជុំវិញការបែងចែកតំបន់ ដែលរឹបអូសបាន និងការគ្រប់គ្រងលើជនស៊ីវិលក្នុងតំបន់ទាំងនោះ៕
ប្រែសម្រួល៖ប៉ោក លក្ខិណា
ប្រភពព័ត៌មាន sana ចុះផ្សាយថ្ងៃទី០១ ខែកុម្ភៈ ឆ្នាំ២០២១
