រដ្ឋអ៊ីស្លាម (IS) នៅថ្ងៃពុធ ទី០៧ ខែមេសា ដោះលែងមនុស្សចំនួន៤៦នាក់ក្នុងចំណោម មនុស្សចំនួន៥៩នាក់ដែលពួកគេចាប់ខ្លួនបាននៅតំបន់វាលខ្សាច់ខាងកើតខេត្ត Hama ភាគកណ្តាលនៃប្រទេសស៊ីរី។
បើយោងតាមក្រុមឃ្លាំមើលសិទ្ធិមនុស្សស៊ីរីបញ្ជាក់ឲ្យដឹងថា ក្រុមឧទ្ទាមនៅតែបន្តឃុំខ្លួនមនុស្សដែលនៅសល់ចំនួន ១៣នាក់។
គួរឲ្យកត់សម្គាល់ផងដែរថា មន្ត្រីប៉ូលិសចំនួន១នាក់រងការបាញ់សម្លាប់ ហើយគេជឿថា នៅមានមនុស្សជាច្រើនទៀតស្លាប់ក្នុងអំឡុងពេលវាយប្រហាររបស់ឧទ្ទាមISដោយនោះគឺជាប្រតិបត្តិការចាប់ជំរិតធំបំផុតរបស់ក្រុមនេះនៅក្នុងតំបន់វាលខ្សាច់។
ក្រោយពីបាត់បង់តំបន់សំខាន់ៗនៅទូទាំងប្រទេសស៊ីរី ឥឡូវនេះក្រុមសកម្មប្រយុទ្ធ IS ធ្វើសកម្មភាពយ៉ាងខ្លាំងនៅក្នុងតំបន់វាលខ្សាច់ និងបន្តការវាយប្រហាររបស់ពួកគេទៅដល់ភាគខាងកើតនៃប្រទេសស៊ីរី។ ក្រុមសកម្មប្រយុទ្ធតែងតែធ្វើការវាយប្រហារ និងវាយឆ្មក់ប្រឆាំងនឹងកងកម្លាំងរដ្ឋាភិបាលស៊ីរីនៅតំបន់វាលខ្សាច់ដែលកត្តានោះបានជម្រុញឱ្យយន្តហោះចម្បាំងស៊ីរី និងរុស្ស៊ីវាយប្រហារបកលើទីតាំងរបស់ពួកគេវិញ។
គួររំលឹកផងដែរថា គិតចាប់តាំងពីខែមីនា ឆ្នាំ២០១៩ មកទាហានស៊ីរី និងយុទ្ធជនគាំទ្ររដ្ឋាភិបាលសរុបចំនួន១,៣៨១នាក់ត្រូវក្រុម ISសម្លាប់ក្នុងការវាយប្រហារ ខណៈដែលសមាជិកឧទ្ទាមIS ចំនួន៨៩៦នាក់ក៏ត្រូវកម្លាំងទាហានសម្លាប់ក្នុងអំឡុងពេលដូចគ្នា៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែមេសា ឆ្នាំ២០២១
