យោធាអ៊ីរ៉ាក់និយាយនៅថ្ងៃពុធ ទី០៧ ខែមេសាថា ការវាយប្រហារតាមអាកាសលើតំបន់ភ្នំមួយក្នុងខេត្ត Salahudin ភាគខាងជើងរដ្ឋធានី Baghdad នៃប្រទេសអ៊ីរ៉ាក់ សម្លាប់សមាជិកឧទ្ទាមអ៊ីស្លាម (IS) សរុបចំនួន៦០នាក់។
យន្ដហោះអ៊ីរ៉ាក់ក្រោយពីទទួលបានការគាំទ្រពីសេវាកម្មប្រឆាំងភេរវកម្ម (CTS) បានធ្វើការវាយប្រហារតាមអាកាសទៅលើទីតាំងលាក់ខ្លួនរបស់សមាជិកឧទ្ទាម IS នៅថ្ងៃទី២៥ ខែមីនាទៅលើជួរភ្នំ Himreen ដោយសម្លាប់សមាជិកឧទ្ទាម IS ចំនួន ៦០នាក់។
លោក Rasoul មានប្រសាសន៍នៅក្នុងសេចក្តីថ្លែងការណ៍មួយនៅថ្ងៃទី២៤ ខែមីនាថាកងកម្លាំងសន្តិសុខអ៊ីរ៉ាក់គាំទ្រដោយកម្លាំងចម្រុះដឹកនាំដោយកម្លាំងសហរដ្ឋអាមេរិកនិងយន្តហោះអ៊ីរ៉ាក់ចាប់ផ្តើមធ្វើការប្រហារនៅថ្ងៃទី៩ ខែមីនា និងបន្តការវាយប្រហារនោះរយៈពេល១៤ថ្ងៃទៅលើជួរភ្នំ Makhmour ក្នុងខេត្ត Ninevehភាគខាងជើងប្រទេសអ៊ីរ៉ាក់។ ប្រតិបត្តិការនោះបំផ្លាញទីតាំងរបស់ឧទ្ទាមISចំនួន១២០កន្លែង និងសម្លាប់សមាជិកឧទ្ទាមចំនួន២៧នាក់។
លោក Rasoul បន្ថែមថា ការវាយលុកនៅក្នុងខែមីនា បង្ខំឲ្យសមាជិកឧទ្ទាម IS រត់ភៀសខ្លួនទៅលាក់ខ្លួននៅតំបន់ភ្នំ Himreen ក្នុងខេត្ត Salahudin។ លើសពីនេះ ភ្នំនិងតំបន់រឹងមាំផ្សេងទៀតនៅភាគខាងជើងនៃទីក្រុងបាកដាដ(Bakhdad)មានកំណើនសកម្មភាពយ៉ាងខ្លាំងក្លារបស់សមាជិកឧទ្ទាម IS នៅរយៈពេលប៉ុន្មានខែកន្លងមកនេះ បើទោះបីជាមានប្រតិបត្តិការរបស់កងកម្លាំងយោធាម្តងហើយម្តងទៀតដើម្បីតាមប្រមាញ់ពួកគេក៏ដោយ។
គួររំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងវិញចាប់តាំងពីកងកម្លាំងសន្តិសុខអ៊ីរ៉ាក់កម្ចាត់សមាជិកឧទ្ទាមISនៅទូទាំងប្រទេសចុងឆ្នាំ២០១៧ ។
យ៉ាងណាមិញ សមាជិកឧទ្ទាម IS ដែលនៅសេសសល់បានបង្កប់ខ្លួននៅតាមទីប្រជុំជន ឬតំបន់វាលខ្សាច់ និងតំបន់រឹងមាំផ្សេងទៀតដោយធ្វើការវាយប្រហារឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែមេសា ឆ្នាំ២០២១
