យោធាអ៊ីរ៉ាក់និយាយថា នៅថ្ងៃអាទិត្យ ទី១៨ ខែមេសា គ្រាប់រ៉ុក្កែតចំនួន៥គ្រាប់វាយប្រហារលើមូលដ្ឋានទ័ពអាកាសអ៊ីរ៉ាក់មួយកន្លែងនៅខេត្តSalahudinភាគខាងជើងនៃរដ្ឋធានី Baghdad បណ្តាលឲ្យសមាជិកសន្តិសុខចំនួន០២នាក់រងរបួស។
សេចក្តីថ្លែងការណ៍របស់ការិយាល័យសារព័ត៌មាននៃបញ្ជាការប្រតិបត្តិការរួមអ៊ីរ៉ាក់ (JOC) បញ្ជាក់ឲ្យដឹងថា គ្រាប់រ៉ុក្កែតទាំងនោះបាញ់ចេញពីតំបន់ al-Dojama ដែលជាតំបន់មួយស្ថិតនៅតាមដងទន្លេ Tigris នៅជាប់ខេត្ត Diyala។ ក្រោយមក គ្រាប់រ៉ុកក្កែតទាំងនោះធ្លាក់នៅមូលដ្ឋានទ័ពអាកាស Balad ដែលមានចម្ងាយប្រហែល៩០ គីឡូម៉ែត្រពីភាគខាងជើងនៃទីក្រុង Baghdad ។
សេចក្តីថ្លែងការណ៍ JOC បានឲ្យដឹងថា ជាលទ្ធផលការវាយប្រហារនោះបណ្តាលឲ្យសមាជិកចំនួន០២នាក់របស់កម្លាំងអ៊ីរ៉ាក់ដែលមានភារកិច្ចការពារមូលដ្ឋានរងរបួស។ JOC បាននិយាយថា៖ “សកម្មភាពដ៏សាហាវទាំងនោះកំណត់គោលដៅលើប្រតិបត្តិការប្រមូលផ្តុំយោធារបស់យើង ដោយការវាយប្រហារបែបនោះត្រូវបានចាត់ទុកថាជាអំពើភេរវកម្ម” ។
មុនពេលមានសេចក្តីរាយការណ៍ លោក Mohammed al-Bazi ប៉ូលិសខេត្ត Salahudin ប្រាប់ភ្នាក់ងារសារព័ត៌មានថា យ៉ាងហោចណាស់មានគ្រាប់រ៉ុក្កែត Katyusha ចំនួន០៤គ្រាប់វាយប្រហារលើមូលដ្ឋាន Balad នៅពេលថ្ងៃលិច ហើយគ្រាប់រ៉ុក្កែតចំនួន០៣គ្រាប់ធ្លាក់នៅក្នុងមូលដ្ឋានទ័ពអាកាសដោយពុំទាន់ដឹងអំពីមនុស្សគ្រោះថ្នាក់ឬយ៉ាងណានោះទេ។
ឡួរបញ្ជាក់ផងដែរថា មូលដ្ឋាន Balad មានផ្ទុកយន្តហោះប្រយុទ្ធ F-16 របស់អ៊ីរ៉ាក់ និងអ្នកជំនាញ រួមទាំងទីប្រឹក្សាមួយចំនួនរបស់សហរដ្ឋអាមេរិក គឺជាមូលដ្ឋានទ័ពអាកាសធំបំផុតនៅក្នុងប្រទេសអ៊ីរ៉ាក់។ កងទ័ពសហរដ្ឋអាមេរិកបានដកថយចេញពីមូលដ្ឋាននោះអស់រយៈពេលច្រើនជាងមួយឆ្នាំមកហើយ ក្រោយពីមូលដ្ឋាននោះរងការវាយប្រហារពីគ្រាប់រ៉ុក្កែតជាច្រើនរបស់កងជីវពលមិនស្គាល់អត្តសញ្ញាណ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៩ ខែមេសា ឆ្នាំ២០២១
