សាធារណរដ្ឋឆេកកាលពីថ្ងៃអង្គារ ទី២០ ខែមេសានេះបានអំពាវនាវដល់សហភាពអ៊ឺរ៉ុប និងអង្គការណាតូរបស់ខ្លួនឱ្យបណ្តេញក្រុមអ្នកការទូតរុស្ស៊ីដោយចោទប្រកាន់ក្រុងម៉ូស្គូថាជាអ្នករៀបចំការវាយប្រហារភេរវកម្មដែលមិនធ្លាប់មានពីមុនមកលើទឹកដីនៃប្រទេសឆេក។
រដ្ឋមន្ត្រីក្រសួងការបរទេស និងមហាផ្ទៃលោក Jan Hamacek បាននិយាយថា លោកនឹងកោះហៅឯកអគ្គរដ្ឋទូតរុស្ស៊ីនៅថ្ងៃពុធនេះដើម្បីបង្ហាញជំហានបន្ថែមទៀតបន្ទាប់ពីការបណ្តេញក្រុមអ្នកការទូតរុស្ស៊ីចំនួន ១៨ នាក់ដែលក្រុងPrague ជឿជាក់ថាជាភ្នាក់ងារសម្ងាត់នោះ។
លោក Hamacek បានប្រាប់អ្នកយកព័ត៌មានថា “យើងកំពុងអំពាវនាវឱ្យមានសកម្មភាពសមូហភាពរបស់សហភាពអឺរ៉ុប និងបណ្តាប្រទេសណាតូដែលមានគោលបំណងក្នុងការបណ្តេញចេញនេះ”។ ការអំពាវនាវនេះធ្វើឡើងបន្ទាប់ពីក្រុងPragueបានចោទប្រកាន់ក្រុមសម្ងាត់រុស្ស៊ីពីបទរៀបចំការផ្ទុះដ៏សាហាវនៅលើទឹកដីនៃប្រទេសឆេកកាលពីឆ្នាំ ២០១៤ ។ នាយករដ្ឋមន្ត្រីប្រទេសឆេកលោក Andrej Babis បាននិយាយថាឧប្បត្តិហេតុដែលបានសម្លាប់មនុស្សពីរនាក់គឺជា “ការវាយប្រហារភេរវកម្មដែលមិនធ្លាប់មានពីមុនមកលើទឹកដីរបស់យើងដែលមិនអាចទទួលយកបានទេ”៕
សម្រួល៖ សុផា
