ក្រុមមេធាវីរបស់លោកស្រីបាននិយាយថា យោធាភូមាបានពន្យារពេលនីតិវិធីតុលាការសារជាថ្មីម្តងទៀតប្រឆាំងនឹងលោកស្រីអោងសានស៊ូជីនៅថ្ងៃច័ន្ទ ទី២៦ ខែមេសា បន្ទាប់ពីលោកស្រីត្រូវបានឃុំខ្លួនរយៈពេល ១២ សប្តាហ៍នេះ។ ប្រទេសមីយ៉ាន់ម៉ាបានស្ថិតក្នុងភាពច្របូកច្របល់ចាប់តាំងពីយោធាបានបណ្តេញលោកស្រីនៅក្នុងរដ្ឋប្រហារថ្ងៃទី ១ ខែកុម្ភៈដោយបានធ្វើឱ្យប្រទេសនេះវិលត្រឡប់ទៅរកការគ្រប់គ្រងរបស់របបយោធា។
ប្រជាជនបាននាំគ្នាធ្វើបាតុកម្មនៅតាមដងផ្លូវ ហើយកងកំលាំងសន្តិសុខបានធ្វើយុទ្ធនាការឃោរឃៅដើម្បីបង្ក្រាបការបះបោរទ្រង់ទ្រាយធំនេះ។ លោកស្រីអ៊ុងសានស៊ូជីបានស្ថិតនៅក្នុងការឃុំឃាំងក្នុងផ្ទះដោយរបបយោធាបានចោទប្រកាន់លោកស្រីក្រោម ៦ ករណីរួមមានការបះបោរ និងការប្រើប្រាស់នូវវិទ្យុទាក់ទងដោយគ្មានការអនុញ្ញាត។
មេធាវី Min Min Soe បាននិយាយកាលពីថ្ងៃច័ន្ទនេះថា ការបើកសវនាការលើរឿងក្តីរបស់លោកស្រីត្រូវបានពន្យារពេលម្តងទៀតរហូតដល់ថ្ងៃទី ១០ ខែឧសភានេះ។ រយៈពេល ១២ សប្តាហ៍ចាប់តាំងពីលោកស្រីអ៊ុងសានស៊ូជីត្រូវបានឃុំខ្លួន មេធាវី Min Min Soe បាននិយាយថាពួកគេនៅតែមិនទាន់ទទួលបានការអនុញ្ញាតឱ្យជួបកូនក្តីរបស់ពួកគេទល់មុខគ្នានោះទេ ហើយនេះជាឧបសគ្គមួយក្នុងចំណោមឧបសគ្គជាច្រើនដែលក្រុមការងារបានជួបប្រទះ៕
សម្រួល៖ សុផា
