វ៉ាស៊ីនតោន៖ ក្រសួងការបរទេសសហរដ្ឋអាមេរិកនៅថ្ងៃអង្គារ ទី២៧ ខែមេសានេះបានបញ្ជាឱ្យបុគ្គលិកចាកចេញពីស្ថានទូតសហរដ្ឋអាមេរិកនៅទីក្រុងកាប៊ុលក្នុងប្រទេសអាហ្វហ្គានីស្ថានដោយសារតែមានបញ្ហាសន្តិសុខកើនឡើង។
នាយកដ្ឋានរដ្ឋលើកឡើងថា ពួកគេបានបញ្ជាឱ្យបុគ្គលិករដ្ឋាភិបាលសហរដ្ឋអាមេរិកចាកចេញពីស្ថានទូតអាមេរិកនៅក្នុងទីក្រុងកាប៊ុល ខណៈដែលបុគ្គលិកទាំងនោះអាចទទួលតួនាទីទៅប្រតិបត្តិការងារនៅកន្លែងផ្សេងទៀត។
មន្ត្រីទទួលបន្ទុកសហរដ្ឋអាមេរិកប្រចាំនៅប្រទេសអាហ្វហ្គានីស្ថានលោក Ross Wilson បសរសេរលើបណ្តាញសង្គម Tweeter ថា ការចាកចេញនេះត្រូវបានអនុម័ត ក្រោយពីមានការកើនឡើងនូវរបាយការណ៍ស្តីពីអំពើហិង្សានិងការគម្រាមកំហែងនៅក្នុងទីក្រុងកាប៊ុល។
លោកបន្ថែមថា ការចាកចេញនេះនឹងជះឥទ្ធិពលដល់បុគ្គលិកមួយចំនួនតូចនៅក្នុងស្ថានទូតអាមេរិកប្រចាំទីក្រុងកាប៊ុល។ ការដកកងកម្លាំងចេញត្រូវធ្វើឡើងឲ្យបានថ្ងៃមុនថ្ងៃទី១ ខែឧសភាខាងមុខនេះ ក្រោយពីលោកប្រធានាធិបតី Joe Biden ធ្លាប់បានប្រកាសរួចមកហើយនៅដើមខែមេសានេះថា កងទ័ពសហរដ្ឋអាមេរិក និងកងទ័ពណាតូនឹងចាប់ផ្តើមដកខ្លួនចេញពីប្រទេសអាហ្វហ្គានីស្ថាន។
ទោះជាយ៉ាងណាក៏ដោយ រដ្ឋបាលមុនរបស់ លោក Donald Trump និងក្រុមតាលីបង់អាហ្វហ្គានីស្ថានបានកំណត់យ៉ាងច្បាស់ថាយកថ្ងៃទី១ ឧសភាជាថ្ងៃផុតកំណត់នៃការដកកងកម្លាំងទ័ពសហរដ្ឋអាមេរិកចេញពីប្រទេសអាហ្វហ្គានីស្ថាន។ លើសពីនេះ ក្រុមសកម្ម្រយុទ្ធតាលីបង់បានព្រមានបន្ថែមថានឹងមានផលវិបាកនានាកើតមាន ប្រសិនបើរដ្ឋបាលរបស់លោកប្រធានធិបតី Biden ខកខានពុំបានអនុវត្តតាមឱសានវាទនោះ។
គួររំលឹកផងដែរថា កងទ័ពសហរដ្ឋអាមេរិកចំនួន ៣៥០០នាក់មានវត្តមានតាំងនៅក្នុងប្រទេសអាហ្វហ្គានីស្ថាន ហើយកងទ័ពណាតូចំនួន ៧០០០នាក់នៅក្នុងប្រទេសនោះក៏បានរស់នៅពឹងផ្អែកលើការគាំទ្រជំនួយផ្នែកភស្តុភារ និងសន្តិសុខរបស់សហរដ្ឋអាមេរិក៕
ប្រែសម្រួល៖ ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី២៨ ខែមេសា ឆ្នាំ២០២១
