រដ្ឋមន្ត្រីក្រសួងការបរទេសសហរដ្ឋអាមេរិកលោក Antony Blinken និយាយនៅក្នុងបទសម្ភាសន៍មួយដែលបានចាក់ផ្សាយកាលពីថ្ងៃអាទិត្យ ទី២ ខែឧសភានេះថា ប្រទេសចិនដ៏មានឥទ្ធិពលនោះកំពុងធ្វើសកម្មភាពរឹតតែខ្លាំងក្លា និងការឈ្លានពាននៅពេលដែលប្រទេសនេះផ្លាស់ប្តូរឥទ្ធិពលរបស់ខ្លួន។
អ្នកការទូតកំពូលអាមេរិករូបនេះនិយាយនៅក្នុងបទសម្ភាសន៍ជាមួយសារព័ត៌មាន CBS ថា“ អ្វីដែលយើងឃើញក្នុងរយៈពេលប៉ុន្មានឆ្នាំចុងក្រោយនេះគឺប្រទេសចិនកំពុងធ្វើសកម្មភាពគាបសង្កត់នៅក្នុងប្រទេស និងកាន់តែខ្លាំងក្លាបន្ថែមទៀតនៅបរទេស។ នោះគឺជារឿងពិត” ។
សុន្ទរកថារបស់លោកបានធ្វើឡើងបន្ទាប់ពីលោកប្រធានាធិបតី Joe Biden នៅក្នុងសុន្ទរកថាដំបូងរបស់លោកទៅកាន់សភាកាលពីថ្ងៃពុធសប្តាហ៍មុននេះដោយបញ្ជាក់ថា លោកមិនបានស្វែងរកជម្លោះជាមួយទីក្រុងប៉េកាំងនោះទេ។ លោក Biden និយាយថា លោកបានប្រាប់ប្រធានាធិបតីចិនលោក Xi Jinping ថា នៅក្នុងការប្រកួតប្រជែងដើម្បីក្លាយជាមហាអំណាចនៃសតវត្សរ៍ទី ២១ នេះ យើងសូមស្វាគមន៍ការប្រកួតប្រជែង ហើយយើងមិនស្វែងរកជម្លោះនោះទេ៕
សម្រួល៖ សុផា
