យោធាអ៊ីរ៉ាក់និយាយថា គ្រាប់រ៉ុក្កែត Katyusha ចំនួន ០២គ្រាប់នៅថ្ងៃអង្គារ ទី០៤ បានធ្លាក់លើមូលដ្ឋានកងទ័ពអាកាសដែលដឹកនាំដោយសហរដ្ឋអាមេរិកនៅក្នុងខេត្ត Anbar ភាគខាងលិចប្រទេសអ៊ីរ៉ាក់។
យោងតាមសេចក្តីថ្លែងការណ៍ខ្លីមួយចេញដោយការិយាល័យប្រព័ន្ធប្រតិបត្តិការនៃបញ្ជាការប្រតិបត្តិការចម្រុះបានឲ្យដឹងថា គ្រាប់រ៉ុក្កែតទាំងចំនួន ០២គ្រាប់ធ្លាក់ទៅក្នុងតំបន់ទំនេរមួយនៅក្នុងមូលដ្ឋានទ័ពអាកាស Ayn al-Asad ដោយហេតុការណ៍នេះពុំបណ្តាលឱ្យមានមនុស្សរងគ្រោះថ្នាក់ឡើយ។
ប្រភពព័ត៌មានពីកងទ័ពអ៊ីរ៉ាក់បង្ហើបប្រាប់ភ្នាក់ងារសារព័ត៌មានឲ្យដឹងថាថា គ្រាប់រ៉ុក្កែតទាំងនោះបាញ់ចេញពីភូមិ al-Biyader ភាគខាងកើតនៃទីក្រុង al-Baghdadi ដែលមានចម្ងាយប្រហែល ១៩០គីឡូម៉ែត្រភាគពាយព្យនៃរដ្ឋធានីបាកដាដ(Baghdad)។
ការវាយប្រហារនោះកើតឡើងនៅមួយថ្ងៃក្រោយពីមានការបាញ់គ្រាប់កាំភ្លើង Katyusha ចំនួន ០៣គ្រាប់កំណត់គោលដៅទៅលើមូលដ្ឋានទ័ពអាកាសបាឡាដ (Balad) ដែលមានចម្ងាយប្រហែល ៩០ គីឡូម៉ែត្រខាងជើងទីក្រុងបាកដាដ (Baghdad) ដោយហេតុការណ៍នោះពុំបានបណ្តាលឲ្យមានមនុស្សរងគ្រោះថ្នាក់ឡើយ។
រហូតមកដល់ពេលនេះពុំទាន់មានក្រុមណាមួយប្រកាសទទួលខុសត្រូវចំពោះការវាយប្រហារនេះនៅឡើយទេ។
សូមបញ្ជាក់ផងដែរថា មូលដ្ឋានយោធាអ៊ីរ៉ាក់ជាកន្លែងស្នាក់នៅរបស់កងកម្លាំងទ័ពសហរដ្ឋអាមេរិកនៅទូទាំងប្រទេសអ៊ីរ៉ាក់ ហើយចំណែកឯស្ថានទូតសហរដ្ឋអាមេរិកនៅក្នុងតំបន់បៃតងក៏រងការវាយប្រហារជាញឹកញាប់ពីគ្រាប់កាំភ្លើងធំ និងគ្រាប់រ៉ុក្កែតផងដែរ៕
