អ៊ីរ៉ាក់៖ ប្រធានក្រុមស៊ើបអង្កេតបទឧក្រិដ្ឋអ៊ីស្លាមនៅក្នុងប្រទេសអ៊ីរ៉ាក់ លោក Karim Khan មានប្រសាសន៍នៅថ្ងៃចន្ទថា មានភស្តុតាងជាក់ស្តែង និងគួរឲ្យជឿជាក់បង្ហាញពីក្រុមភេរវករមានបំណងធ្វើអំពើប្រល័យពូជសាសន៍ប្រឆាំងនឹងជនជាតិយ៉ាហ្សីឌី។
លោក Khan ប្រាប់ក្រុមប្រឹក្សាសន្តិសុខក្នុងសន្និសីទសារព័ត៌មានថា៖ ”ដោយយោងទៅតាមការស៊ើបអង្កេតឯករាជ្យ និងមិនលម្អៀងតាមស្តង់ដារអន្តរជាតិ និងការអនុវត្តដ៏ល្អបំផុតរបស់អង្គការសហប្រជាជាតិ លោកហ៊ានអះអាងបានថា មានភស្ដុតាងពិតប្រាកដ និងគួរឱ្យជឿជាក់ពីឧក្រិដ្ឋកម្មប្រឆាំងនឹងប្រជាជនយ៉ាហ្សីឌី ដែលបង្ហាញថាជាអំពើ ប្រល័យពូជសាសន៍យ៉ាងច្បាស់” ។
លោកបន្ថែមទៀតថា កាន់តែពិសេសនោះគឺអាជ្ញាធរកំណត់បានអត្តសញ្ញាណជនល្មើសមួយចំនួនរួចមកហើយ ដែលពួកគេត្រូវទទួលខុសត្រូវទាំងស្រុងចំពោះបទឧក្រិដ្ឋកម្មប្រល័យពូជសាសន៍ប្រឆាំងនឹងសហគមន៍ជនជាតិយ៉ាហ្សីឌី ។
ក្រុមឧទ្ទាម IS ពិតជាមានគោលបំណងសំខាន់ក្នុងការបំបាត់ជនជាតិយ៉ាហ្សីឌី ចោលទាំងស្រុង ដោយសារតែសកម្មភាពរបស់ភេរវករគឺតែងតែកែប្រែប្រជាជនទាំងនោះឲ្យគោរពតាមពួកគេ ឬក៏សម្លាប់ប្រជាជនទាំងនោះចោលតែម្តង ហើយទង្វើទាំងនេះកើតឡើងដដែលៗលើជនជាតិយ៉ាហ្សីឌី នៅភូមិជាច្រើនផ្សេងៗគ្នាក្នុងប្រទេសអ៊ីរ៉ាក់៕
ប្រែសម្រួល៖ ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី១១ ខែឧសភា ឆ្នាំ២០២១
