ក្រុមហ៊ុន DNA លើកឡើងនៅថ្ងៃអង្គារ ទី១១ ខែឧសភាថា បណ្តាញសង្គមចែករំលែកវីដេអូរ TikTok បានផ្លាស់ប្តូរទម្លាប់ពេលព្រឹករបស់ក្មេងៗនៅក្នុងប្រទេសហ្វាំងឡង់។
TikTok គឺជាបណ្តាញសង្គមចែករំលែកវីដេអូររយៈពេលមួយនាទីដ៏ល្បីល្បាញរបស់ប្រទេសចិន ដែលកំពុងទទួលបានការគាំទ្របំផុតនាពេលបច្ចុប្បន្ន។ យ៉ាងណាមិញ អ្នកដែលនិយមប្រើប្រាស់កម្មវិធីនេះភាគច្រើនគឺជាក្មេងៗ ។
“ពីមុនមក ក្មេងៗធ្លាប់តែមើលទូរទស្សន៍មុនទៅសាលារៀន ប៉ុន្តែបច្ចុប្បន្នពួកគេបែរជាចំណាយពេលវេលាលើបណ្តាញសង្គម TikTok នៅពេលព្រឹក” នេះបើយោងតាមការលើកឡើងនៅក្នុងសេចក្តីថ្លែងការណ៍។
ទិន្នន័យស្ថិតិទូរស័ព្ទដៃប្រមូលដោយក្រុមហ៊ុន DNA បានបង្ហាញយ៉ាងច្បាស់ថា ការប្រើប្រាស់បណ្តាញសង្គម TikTok មានកំណើនយ៉ាងខ្លាំងចន្លោះពីម៉ោង៧ព្រឹក និងម៉ោង៨ព្រឹក ខណៈដែលទិន្ន័យបែបនេះពុំមាននៅលើបណ្តាញសង្គមផ្សេងទៀតនោះទេ។
អនុប្រធានផ្នែកអាជីវកម្មអ៊ីនធឺរណិត និងទូរទស្សន៍ លោក Jarno Haikonen បញ្ជាក់ថា បច្ចុប្បន្នប្រជាជនហ្វាំងឡង់បានបណ្តាយឲ្យក្មេងៗប្រើប្រាស់បណ្តាញសង្គម TikTok ក្លាយជាសកម្មភាពទី១ របស់ក្មេងៗនៅពេលព្រឹក។ យ៉ាងណាមិញ យោងតាមការស្ទង់មតិមួយផ្សេងទៀតរកឃើញថា អ្នកប្រើប្រាស់ TikTok ដែលមានអាយុចន្លោះពី១៦ ដល់២៤ ឆ្នាំ មានចំនួន ៧០ភាគរយ។ ចំណែកឯអ្នកប្រើប្រាស់ដែលមានអាយុពី២៥ ដល់៣៤ឆ្នាំ មានចំនួន ១៩ភាគរយ ហើយអ្នកប្រើប្រាស់ជាមនុស្សចាស់មានតិចជា ១០ភាគរយ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៣ ខែឧសភា ឆ្នាំ២០២១
