ទាហានអ៊ីស្រាអែលនិយាយថា ទាហានអ៊ីស្រអែលចំនួន ១នាក់ត្រូវបានសម្លាប់នៅក្នុងហេតុការណ៍វាយប្រហារគ្រាប់មីស៊ីលនៅជិតតំបន់ហ្គាហ្សា។ ហេតុការណ៍នោះកើតឡើងនៅថ្ងៃពុធ ទី១២ ខែឧសភា ឆ្នាំ២០២១ ។
អ្នកនាំពាក្យយោធាអ៊ីស្រាអែលបានឲ្យដឹងថា ទាហានដែលស្លាប់រូបនោះមានឈ្មោះថាអូម័រ តាប៊ីប (Omer Tabib) អាយុ ២១ឆ្នាំ មកពីស្រុកអេឡៃគីម (Eliakim) ភាគខាងជើងប្រទេសអ៊ីស្រសាអែល។
យោងតាមការលើកឡើងក្នុងសេចក្តីថ្លែងការណ៍របស់អ្នកនាំពាក្យបានឲ្យដឹងថា តាប៊ីបត្រូវបានសម្លាប់នៅព្រឹកថ្ងៃពុធ ក្រោយពីក្រុមសកម្មប្រយុទ្ធហាម៉ាស់បាញ់គ្រាប់មីស៊ីលប្រឆាំងនឹងរថក្រោះ។ ហេតុការណ៍នោះបានកើតឡើងក្នុងកំឡុងពេលដែលលោកចេញធ្វើប្រតិបត្តិការដើម្បីការពារសហគមន៍ដែលមានទីតាំងក្បែរនោះ។
ហេតុការណ៍នោះក៏បានបណ្តាលឲ្យទាហានចំនួន ២នាក់ផ្សេងទៀតរងរបួសដោយទាហានម្នាក់រងរបួសស្រាល និងម្នាក់ទៀតរងរបួសធ្ងន់។
ចំណែកឯភាគីអ៊ីស្រាអែលនិយាយថា ទាហានអ៊ីស្រាអែលបានសម្លាប់សមាជិកជាន់ខ្ពស់របស់សកម្មប្រយុទ្ធហ៉ាម៉ាស់ចំនួន ១៦នាក់នៅក្នុងការវាយប្រហារតាមអាកាស។
គួរបញ្ជាក់ផងដែរថា យ៉ាងហោចណាស់មានមនុស្សចំនួន ៥៣នាក់ និងទាហានអ៊ីស្រាអែល ចំនួន ៦នាក់ស្លាប់ក្នុងការវាយប្រហារនៅតំបន់ហ្គាហ្សាដោយគិតចាប់ពីថ្ងៃចន្ទ ដើមសប្តាហ៍នេះ នៅក្នុងជម្លោះរវាងកម្លាំងយោធាអ៊ីស្រាអែល ជាមួយនឹងក្រុមសកម្មប្រយុទ្ធក្នុងតំបន់ហ្គាហ្សា ដែលកើតមានចាប់តាំងពីឆ្នាំ២០១៤មក៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១២ ខែឧសភា ឆ្នាំ២០២១
