ប្រទេសអ៊ីរ៉ាក់៖មន្ត្រីក្រសួងមហាផ្ទៃអ៊ីរ៉ាក់ប្រាប់ឲ្យដឹងថា មនុស្ស ២នាក់រងបួសនៅរសៀលថ្ងៃពុធ ក្នុងហេតុការណ៍ផ្ទុះគ្រាប់បែក ២លើកនៅទីក្រុងបាដាដនៃប្រទេសអ៊ីរ៉ាក់។
ប្រភពអណាមិកប្រាប់ភ្នាក់ងារព័ត៌មានឲ្យដឹងថា ហេតុការណ៍ផ្ទុះមួយបានកើតឡើងនៅសង្កាត់ការ៉ាដា (Karrada) នៅកណ្តាលទៅទីក្រុងបាដាដ ក្រោយពីគ្រាប់បែកម៉ាញ៉េទិចមួយគ្រាប់បានផ្ទុះចំយាន្តជំនិះមួយគ្រឿងនៅក្រុមហ៊ុនសន្តិសុខឯកជនអ៊ីរ៉ាក់មួយ និងបណ្តាលឲ្យមនុស្ស ២នាក់រងរបួស។ ហេតុការណ៍ផ្ទុះមួយទៀតបានកើតឡើងនៅហាងស្រាមួយកន្លែងនៅក្នុងសង្កាត់ដដែល ដោយបានបណ្តាលឲ្យខូចខាតសម្ភារៈជាច្រើនក្នុងហាង។
ប្រភពបានបន្ថែមឲ្យដឹងថា កម្លាំងសន្តិសុខអ៊ីរ៉ាក់បានបិទតំបន់ផ្ទុះនោះ និងបានបើកការស៊ើបអង្កេតលើឧបទ្ទវហេតុនេះ។
គួរបញ្ជាក់ផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងចាប់តាំងពីកម្លាំងសន្តិសុខអ៊ីរ៉ាក់បានបង្ក្រាបក្រុមសកម្មប្រយុទ្ធជ្រុលនិយមនៃរដ្ឋអ៊ីស្លាម(IS) នៅទូទាំងប្រទេសនៅចុងឆ្នាំ២០១៧ ។
ទោះបីជាយ៉ាងណាក៏ដោយ ការវាយឆ្មក់នៅតែកើតមានឡើងក្នុងប្រទេសដែលមានសង្រ្គាម ខណៈដែលសមាជិកក្រុមឧទ្ទាម IS ដែលសេសសល់បានលាក់ខ្លួនក្នុងតំបន់ទីក្រុង ឬវាលខ្សាច់ និងតំបន់ផ្សេងទៀត ដោយធ្វើការវាយឆ្មក់ជាញឹកញាប់ប្រឆាំងនឹងកងកម្លាំងសន្តិសុខ និងជនស៊ីវិល៕
ប្រែសម្រួល៖ប៉ោក លក្ខិណា
ប្រភពព័ត៌មាន xinhuanet ចុះផ្សយថ្ងៃទី០៥ ខែសីហា ឆ្នាំ២០២១
