ប្រទេសសូម៉ាលី៖ប៉ូលិសប្រាប់ឲ្យដឹងថា យ៉ាងហោចណាស់មនុស្ស ៨នាក់ ត្រូវបានគេបញ្ជាក់ឲ្យដឹងថា ស្លាប់ និង១៧នាក់ផ្សេងទៀតរងរបួសក្នុងហេតុការណ៍បំផ្ទុះគ្រាប់បែករថយន្តនៅព្រឹកថ្ងៃសុក្រ។
ប៉ូលិសនៅកន្លែងកើតហេតុប្រាប់ភ្នាក់ងារសារព័ត៌មានថា ចំនួនអ្នកស្លាប់អាចនឹងកើនឡើង ក្រោយពីអ្នកបំផ្ទុះគ្រាប់បែកអត្តឃាតបានកំណត់គោលដៅលើក្បួនសន្តិសុខអមបុគ្គលិកបរទេសនៅជិតសាលារៀនក្នុងស្រុកមួយនៅស្រុកហូដានក្នុងទីក្រុងម៉ុងហ្គាឌីស្យុ។
ប៉ូលិសអនាមិកបញ្ជាក់តាមទូរស័ព្ទឲ្យដឹងថា៖ “យ៉ាងហោចណាស់មនុស្ស ៨នាក់ត្រូវបានសម្លាប់ និង១៧នាក់ផ្សេងទៀតរងរបួសក្នុងហេតុការណ៍ផ្ទុះនោះ។ ហេតុការណ៍ផ្ទុះបានកើតឡើងនៅមុខសាលារៀន ម៉ូអាសៀរ ហើយក្មេងមួយចំនួនក៏បានរងរបួសផងដែរ”។
ប៉ូលិសនិយាយថា គោលដៅនៃការវាយប្រហារគឺសំដៅលើក្បួនរបស់កម្លាំងសន្តិសុខ ដែលការពារបុគ្គលិកអង្គការសហប្រជាជាតិ ដែលគេបញ្ជាក់ឲ្យដឹងបន្ថែមថា ក្បួននោះបានធ្វើដំណើរចេញពីជំរុំហ្វឹកហាត់ហ្គ័រដុនទៅមូលដ្ឋានហាលែន។
ក្រុមសកម្មប្រយុទ្ធអាល់ស្ហាបាបបានអះអាងទទួលខុសត្រូវចំពោះការវាយប្រហារនៅក្នុង
ទីក្រុង។
កងទ័ពជាតិសូម៉ាលីគាំទ្រដោយក្រុមបេសកកម្មសហភាពអាហ្វ្រិកនៅប្រទេសសូម៉ាលី ធ្លាប់បានកម្ចាត់ក្រុមសកម្មប្រយុទ្ធអាល់ស្ហាបាបចេញពីទីក្រុងម៉ុងហ្គាឌីស្យុនៅឆ្នាំ២០២១ ប៉ុន្តែក្រុម ភេរវករនៅតែបន្តធ្វើការវាយប្រហារកំណត់គោលដៅលើតំបន់រាជរដ្ឋាភិបាល សណ្ឋាគារ ភោជនីយដ្ឋាន និងទីកន្លែងសាធារណៈផ្សេងៗជាច្រើនទៀត៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៥ ខែវិច្ឆិកា ឆ្នាំ២០២១