កំពង់ផែមួយនៅក្បែរទីក្រុងឡាតាគាក្នុងប្រទេសស៊ីរី ត្រូវបានកំណត់គោលដៅវាយប្រហារ តាមអាកាសរបស់អ៊ីស្រាអែល នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋស៊ីរី ដោយមានទាំងរូបភាពនៅកន្លែងកើតហេតុដែលបង្ហាញពីស្ថានភាពភ្លើងឆាបឆេះដ៏ធំមួយនៅឆ្នេរសមុទ្រមេឌីទែរ៉ាណេ។
គ្រាប់បែកជាច្រើនគ្រាប់បានធ្លាក់លើកំពង់ផែសំខាន់របស់ប្រទេសស៊ីរីនៅក្នុងទីក្រុងឡាតាគា នៅព្រឹកព្រលឹមថ្ងៃអង្គារ។ បើយោងតាមការបញ្ជាក់បន្ថែមពីភ្នាក់ងារសារព័ត៌មានសាណា បានឲ្យដឹងថា សំឡេងផ្ទុះលាន់ឮនៅជុំវិញតំបន់កំពង់ផែដែលគេចាត់ទុកការវាយប្រហារនេះជាការឈ្លានពានតាមអាកាសរបស់កម្លាំងអ៊ីស្រាអែល។
ប្រភពយោធាអណាមិកបានប្រាប់ភ្នាក់ងារសារព័ត៌មាន Sana ថា៖ “សត្រូវអ៊ីស្រាអែលបានធ្វើការឈ្លានពានតាមអាកាស និងគ្រាប់ផ្លោងជាច្រើនគ្រាប់ ចេញពីទិសដៅនៃសមុទ្រមេឌីទែរ៉ាណេ និងភាគនិរតីនៃទីក្រុងឡាតាគា ដោយកំណត់គោលដៅលើទីធ្លាកុងតឺន័រនៅកំពង់ផែពាណិជ្ជកម្មនៃទីក្រុងឡាតាគា។”
វីដេអូដែលគេចែករំលែកនៅលើប្រព័ន្ធផ្សព្វផ្សាយសង្គមបានបង្ហាញពីការវាយប្រហារតាមអាកាសដែលកំពុងកើតមានខណៈដែលរូបភាពមួយចំនួនក៏ត្រូវបានគេអះអាងថាថាជាភ្លើងដែលឆាបឆេះនៅមាត់ច្រកនៃកន្លែងផ្ទុកទំនិញ។
ប្រព័ន្ធការពារដែនអាកាសស៊ីរីក៏ត្រូវបានគេរាយការណ៍ថា បានធ្វើសកម្មភាពឆ្លើយតប បើទោះបីជាគេមិនច្បាស់ថាអាចស្ទាក់ចាប់គ្រាប់បានដែរឬយ៉ាងណា។
កម្លាំងការពារអ៊ីស្រាអែល(IDF)កម្រទទួលស្គាល់ប្រតិបត្តិការផ្លូវអាកាសលើប្រទេសស៊ីរី ហើយ ក៏មិនទាន់មានការបញ្ជាក់ជាផ្លូវការនៅឡើយទេ បើទោះបីជាទីក្រុងថែលអាទីវធ្លាប់បញ្ជាក់ពី
មុនៗមកថា ធ្លាប់ធ្វើការវាយប្រហារស្រដៀងគ្នារាប់រយដងពេញមួយទសវត្សរ៍ក្នុងប្រតិបត្តិការប្រយុទ្ធរបស់ប្រទេសស៊ីរីជាមួយក្រុមឧទ្ទាមអ៊ីស្លាម៕
ប្រែសម្រួល៖ប៉ោក លក្ខិណា
ប្រភពព័ត៌មាន rt ចុះផ្សាយថ្ងៃទី១៧ ខែធ្នូ ឆ្នាំ២០២១
