ប្រទេសស៊ូដង់៖ប្រទេសស៊ូដង់បានធ្វើការបដិសេធចំពោះការចោទប្រកាន់របស់ប្រទេស
អេត្យូពីលើករណីគាំទ្ររណសិរ្សរំដោះប្រជាជននៅតំបន់ថៃហ្គ្រេ(TPLF)ដែលកំពុងប្រយុទ្ធជាមួយកងទ័ពអេត្យូពី។
ក្រសួងការបរទេសស៊ូដង់បានលើកឡើងក្នុងសេចក្តីថ្លែងការណ៍មួយនៅថ្ងៃអាទិត្យថា៖
“ប្រទេសស៊ូដង់គ្រប់គ្រងដែនដីទាំងអស់ដែលទទួលស្គាល់ជាអន្តរជាតិ និងមានព្រំប្រទល់ជាប់ប្រទេសអេត្យូពី ហើយមិនដែល និងមិនអនុញ្ញាតិឲ្យមានការប្រើប្រាស់ទឹកដីសម្រាប់ការឈ្លានពានណាមួយឡើយ” ។
មន្ត្រីក្រសួងបានធ្វើសេចក្តីថ្លែងការណ៍នេះជាការឆ្លើយតបទៅនឹងសេចក្តីរាយការណ៍ព័ត៌មានរបស់បណ្តាញសារព័ត៌មានអេត្យូពីដែលបានចោទថា ប្រទេសស៊ូដង់បានគាំទ្រដល់ទ្ររណសិរ្សរំដោះប្រជាជន TPLF។ នៅក្នុងសេចក្តីថ្លែងការណ៍មានខ្លឹមសារថា៖ “មន្ត្រីក្រសួងចង់បញ្ជាក់ការប្តេជ្ញាចិត្តពេញលេញរបស់ប្រទេសស៊ូដង់ចំពោះគោលការណ៍ភាពជាអ្នកជិតខាងល្អ និងការមិនជ្រៀតជ្រែកចូលកិច្ចការផ្ទៃក្នុងរបស់ប្រទេសដទៃ”។
ក្រសួងការបរទេសស៊ូដង់បានជំរុញឱ្យប្រទេសអេត្យូពីបញ្ឈប់ការចោទប្រកាន់លើប្រទេស
ស៊ូដង់ពីបទប្រកាន់ជំហរឈ្លានពាន និងការអនុវត្តដែលពុំមានភស្តុតាងណាមកបញ្ជាក់។
ជម្លោះនៅតំបន់ថៃហ្គ្រេភាគខាងជើងនៃប្រទេសអេត្យូពីបានប្រែទៅជាសមរភូមិទ្រង់ទ្រាយធំនៅទូទាំងប្រទេស ខណៈដែលក្រុមសកម្មប្រយុទ្ធនៅតំបន់ថៃហ្គ្រេបានព្យាយាមគ្រប់គ្រងលើរដ្ឋធានីអាឌីសអាបាបា៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៣ ខែធ្នូ ឆ្នាំ២០២១
