ប្រទេស៊ីរី៖កម្លាំងគ្រប់គ្រងដោយអាមេរិកគាំទ្រដល់ក្រុមសកម្មប្រយុទ្ធ QSD នៅតែបន្តសកម្មភាពចាប់ជំរិតជនស៊ីវិលនៅក្នុងតំបន់ដែលមានពង្រាយកម្លាំងរបស់ពួកគេ ខណៈពេលដែលពួកគេស្ទាក់រថយន្តក្រុងនៅច្រកចូលភាគខាងលិចនៃទីក្រុងហាសាកា និងបាននាំយុវជន ទៅជំរំ ដើម្បីបង្ខំក្រុមយុវជនទាំងនោះឲ្យចូលរួមប្រយុទ្ធជាមួយពួកគេ។
ប្រភពព័ត៌មានក្នុងតំបន់បានប្រាប់ភ្នាក់ងារសារព័ត៌មានថា ប៉ុស្តិ៍ត្រួតពិនិត្យរបស់កងជីវពល QSD នៅក្នុងតំបន់អាល់មេស្ហៀរហ្វេនៅច្រកចូលខាងលិចនៃទីក្រុងហាសាកា បានស្ទាក់ ចាប់រថយន្ត និងចាប់ជំរិតយុវជនមួយចំនួន ហើយបាននាំពួកគេទៅកាន់ជំរំមួយ ដែលគេហៅ ថាជំរំការពារខ្លួន។
ប្រភពព័ត៌មានដដែលបានបន្ថែមឲ្យដឹងថា យុវជនម្នាក់ដែលមានតម្រូវការពិសេស ត្រូវការការថែទាំសុខភាពផ្លូវកាយ និងផ្លូវចិត្តក៏ស្ថិតក្នុងចំណោមអ្នកត្រូវគេចាប់ខ្លួនដែរ។
គួរបញ្ជាក់ផងដែរថា ក្រុមកងជីវពលបានបង្កើនយុទ្ធនាការវាយឆ្មក់ក្នុងតំបន់ដែលមានពង្រាយកម្លាំងរបស់ពួកគេនៅតំបន់អាល់ហ្សេរ៉ា ហើយពួកគេថែមទាំងបានចាប់ជំរិតយុវជនរាប់រយនាក់នៅក្នុងតំបន់ឌៀរអេហ្ស័រ តំបន់រ៉ាចា និងតំបន់ហាសាកា ដោយបាននាំយុវជនទៅជំរំដើម្បីបង្ខំក្រុមយុវជនទាំងនោះឲ្យចូលរួមប្រយុទ្ធជាមួយពួកគេ៕
ប្រែសម្រួល៖ប៉ោក លក្ខិណា
ប្រភពព័ត៌មាន sana ចុះផ្សាយថ្ងៃទី១៥ ខែធ្នូ ឆ្នាំ២០២១