ប្រទេសអារ៉ាប៊ីសាអូឌីត៖នៅយប់ថ្ងៃពុធនេះ កងជីវពលហ៊ូធីបាននិយាយថា ពួកគេបានបើកការវាយប្រហារបាញ់មីស៊ីលផ្លោង ៥គ្រាប់ទៅលើមូលដ្ឋានឃីង ខាលីដ(King Khalid) នៅក្នុងទី ក្រុងខាមីសម៊ូស្ហេត និងទីក្រុងចាហ្សាន នៃប្រទេសអារ៉ាប៊ីសាអូឌីត។
អ្នកនាំពាក្យយោធាហ៊ូធី លោកយ៉េហា សារៀរ( Yehya Sarea) មានប្រសាសន៍នៅក្នុងសេចក្តីថ្លែងការណ៍មួយ ដែលចុះផ្សាយដោយទូរទស្សន៍ Houthi-run al-Masirah មានខ្លឹមសារថា៖ “កម្លាំងរបស់យើងបានបាញ់គ្រាប់មីស៊ីលផ្លោង ៥គ្រាប់ និងបានវាយប្រហារលើទីតាំងចតយន្តហោះនៅមូលដ្ឋានអាកាសឃីង ខាលីដក្នុងទីក្រុងខាមីសម៊ូស្ហេត។”
លោកបន្ថែមឲ្យដឹងទៀតថា ការវាយប្រហារនោះត្រូវគោលដៅល្អ។
យ៉ាងណាមិញ កម្លាំងចម្រុះដឹកនាំដោយអារ៉ាប៊ីសាអូឌីត ដែលចុះផ្សាយដោយទូរទស្សន៍ Houthi-run al-Masirah មានខ្លឹមសារថាកម្លាំងចម្រុះបានស្ទាក់ចាប់ និងបំផ្លាញមីស៊ីលផ្លោង២គ្រាប់ ដែលបាញ់ដោយកងជីវពលហ៊ូធី ចេញពីអាកាសយានដ្ឋានទីក្រុងសាណាំ ក្នុងរដ្ឋធានី សាណា នៃប្រទេសយេម៉ែនទៅកាន់ទីក្រុងអាប់ហានៃប្រទេសអារ៉ាប៊ីសាអូឌីត។
គួររំលឹកផងដែរថា កងជីវពលហ៊ូធី គាំទ្រដោយកម្លាំងអ៊ីរ៉ង់នាពេលថ្មីៗនេះ បានបង្កើនការបាញ់ប្រហារឆ្លងដែន និងការវាយប្រហារដោយយន្តហោះគ្មានមនុស្សបញ្ជាប្រឆាំងនឹងទីក្រុងអារ៉ាប៊ីសាអូឌីត។ នៅខែកុម្ភៈ ក្រុមឧទ្ទាមយេម៉ែនបានចាប់ផ្តើមធ្វើការវាយប្រហារដ៏ធំមួយប្រឆាំងនឹងកម្លាំងទ័ពរដ្ឋាភិបាលយេម៉ែន ដែលគាំទ្រដោយអារ៉ាប៊ីសាអូឌីត ដើម្បីដណ្តើមយកខេត្តម៉ារ៉ីប ដែលសម្បូរដោយប្រេង នៅភាគកណ្តាលប្រទេសយេម៉ែន៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៦ ខែធ្នូ ឆ្នាំ២០២១
