ប្រទេសប៉ាឡេស្ទីន៖គ្រូពេទ្យប៉ាឡេស្ទីនមានប្រសាសន៍ថា កម្លាំងអ៊ីស្រាអែលបាញ់សម្លាប់ ជនជាតិប៉ាឡេស្ទីនម្នាក់នៅក្នុងរថយន្ត នៅពេលពួកគេធ្វើដំណើរទៅកាន់តំបន់វ៉េស ប៉េងនៅថ្ងៃពុធ។ ចំណែកឯយោធាអ៊ីស្រាអែលនិយាយថា ទាហានអ៊ីស្រាអែលបានបាញ់ជនជាតិប៉ាឡេស្ទីនម្នាក់ ដែលបានបាញ់មកលើពួកគេចេញពីរថយន្តនោះ។
ឧប្បត្តិហេតុនោះបានកើតឡើង ក្រោយពីជនជាតិប៉ាឡេស្ទីនជាច្រើនបានធ្វើការវាយប្រហារលើជនជាតិអ៊ីស្រាអែលនៅរយៈប៉ុន្មានសប្តាហ៍ថ្មីៗមកនេះ។ ម៉្យាងទៀត ជនជាតិប៉ាឡេស្ទីនក៏បានត្អូញត្អែរផងដែរពីការវាយប្រហាររបស់អ្នកតាំងលំនៅអ៊ីស្រាអែល ដោយលំនៅដ្ឋានរបស់ពួកគេស្ថិតនៅតំបន់វ៉េសប៉េង(West Bank) សហគមន៍អន្តរជាតិចាត់ទុកថាខុសច្បាប់។
នៅក្នុងសេចក្តីថ្លែងការណ៍ យោធាបន្ថែមឲ្យដឹងផងដែរថា ទាហានអ៊ីស្រអែលបានរងការបាញ់ប្រហារពីរថយន្តដែលឆ្លងកាត់។ នៅពេលដែលពួកគេតាមរកជនដៃដល់ប៉ាឡេស្ទីននោះ គេរកឃើញនៅជិតតំបន់តាំងលំនៅសាហ្គត(Psagot)របស់ជនជាតិជ្វីហ្វ។ យោធានិយាយថា៖ “កម្លាំងទ័ពបានបាញ់តបតវិញ ទើបបាញ់ត្រូវជនដៃដល់ ហើយកម្លាំងអ៊ីស្រាអែលមិនត្រូវរបួសក្នុងហេតុការណ៍នោះទេ”។
គ្រូពេទ្យប៉ាឡេស្ទីនបន្ថែមឲ្យដឹងថា ទាហានបានដេញតាមរថយន្តនោះរហូតដល់ច្រកចូលជំរំជនភៀសខ្លួនរួចបាញ់ប្រហារបណ្តាលឱ្យបុរសប៉ាឡេស្ទីនរងរបួស។ ចំណែកឯ ទាហានបានបញ្ជាក់ថា បុរសប៉ាឡេស្ទីនត្រូវគេយកទៅមន្ទីរពេទ្យ ជាកន្លែងដែលគេប្រកាសថាគាត់ស្លាប់។ ក្រុមគ្រូពេទ្យបន្តទៀតថា ពួកគេមិនបានដឹងថាតើបុរសជនជាតិប៉ាឡេស្ទីនរូបនោះពិតជាបាន ធ្វើការវាយប្រហារលើទាហានអ៊ីស្រាអែល ដូចដែលគេចោទប្រកាន់ ឬយ៉ាងណានោះទេ។
នៅរយៈពេលមួយថ្ងៃបន្ទាប់មកទៀត អំពើហិង្សាបានកើតឡើងក្រោយពីទាហានអ៊ីស្រាអែលបានបាញ់សម្លាប់អ្នកបើកបររថយន្តប៉ាឡេស្ទីនដោយពួកគេសង្ស័យថាអ្នកបើកបររូបនោះបានព្យាយាមបើករថយន្តរបស់គាត់ចូលទៅក្នុងប៉ុស្តិ៍ត្រួតពិនិត្យយោធាក្បែរតំបន់តាំងលំនៅមេវ៉ូដូថាន(Mevo Dotan) ក្នុងតំបន់វ៉េសប៉េង។
លោកថ័រ វិនលេន(Tor Wennesland) បេសកជនសន្តិភាពមជ្ឈិមបូព៌ារបស់អង្គការសហប្រជាជាតិមានប្រសាសន៍នៅសប្តាហ៍មុនថា លោកមានការភ្ញាក់ផ្អើលចំពោះការកើនឡើងនៃអំពើហិង្សានាពេលថ្មីៗនេះចំពោះភាគីទាំងសងខាង ដោយលោកបានបន្ថែមថាស្ថានការណ៍មាន ការប្រែប្រួលយ៉ាងឆាប់រហ័ស៕
ប្រែសម្រួល៖ប៉ោក លក្ខិណា
ប្រភពព័ត៌មាន reuters ចុះផ្សាយថ្ងៃទី២៣ ខែធ្នូ ឆ្នាំ២០២១
