ប្រភពក្នុងស្រុកបាននិយាយថា មានអគ្គីភ័យមួយបានឆាបឆេះកាលពីថ្ងៃអង្គារនេះស្ថិតនៅក្នុងជំរុំអាល់ហុល (al-Hol) ស្ថិតនៅភាឦសាននៃប្រទេសស៊ីរី ដោយបានឆាប់ឆេះតង់ចំនួន៥០តង់ និងបានធ្វើឱ្យមនុស្សមួយចំនួនរងរបួស។
សាក្សីនៅជំរុំបានចង្អុលបង្ហាញថា អគ្គីភ័យនេះបណ្តាលមកពីការផ្ទុះម៉ាស៊ីនកំដៅដោយបានឆាបឆេះជុំវិញផ្នែកទីបីនៃជំរុំដែលក្នុងនោះមានជនភៀសខ្លួនអ៊ីរ៉ាក់កំពុងស្នាក់នៅ។ ក្នុងហេតុការណ៍នេះបណ្តាលឱ្យមនុស្ស៣នាក់រងរបួស ក្នុងចំណោមអ្នករងរបួសមានស្ត្រីអ៊ីរ៉ាក់ម្នាក់ និងកុមារម្នាក់។
ប្រភពបានបន្ថែមទៀតថា យ៉ាងហោចណាស់តង់ចំនួន៥០ ក៏ត្រូវបានបំផ្លាញដោយភ្លើងផងដែរ មុនពេលភ្លើងរលត់។
គួរបញ្ជាក់ថាជំរុំអាល់ហុលមានទីតាំងនៅខេត្តហាសាកា (Hasakah) មានក្រុមគ្រួសារចំនួន ១៦,៤០៤គ្រួសារស្នាក់នៅ ដែលក្នុងនោះមាន ៨,២៥៦ គ្រួសារមកពីប្រទេសអ៊ីរ៉ាក់ ៥,៦១៩គ្រួសារមកពីប្រទេសស៊ីរី និង២,៥២៩គ្រួសារទៀតមកពីប្រទេសផ្សេងៗ។
ភាគច្រើននៃអ្នករស់នៅក្នុងជំរុំនេះគឺជាអតីតសមាជិកនៃរដ្ឋអ៊ីស្លាម ឬជាក្រុមគ្រួសាររបស់ពួកអ៊ីស្លាម។
អ្នកប្រែសម្រួល៖ គល់ សេងហាក់
ប្រភពព័ត៌មានពី basnews ចេញផ្សាយថ្ងៃទី១៨ ខែមករា ឆ្នាំ២០២២
