ប្រទេសបួគីណាហ្វាសូ៖សមាជិកយោធានៃប្រទេសបួគីណាហ្វាសូបង្ហាញវត្តមាននៅមុខកញ្ចក់ទូរទស្សន៍រដ្ឋ RTB នៅថ្ងៃចន្ទ ដោយអះអាងថាបានដណ្តើមការគ្រប់គ្រងប្រទេស
អាហ្វ្រិកខាងលិច។ ក្រុមយោធានោះនិយាយថា ពួកគេផ្អាកអំណាចគ្រប់គ្រងដោយរដ្ឋធម្មនុញ្ញ ដោយសារតែការបរាជ័យរបស់លោកប្រធានាធិបតី កាប័រ(Kaboré) ក្នុងការបង្រួបបង្រួមជាតិ និងបញ្ឈប់រលកនៃការវាយប្រហាររបស់ក្រុមសកម្មប្រយុទ្ធជីហាដនៅទូទាំងប្រទេស។
លោកកាប័រ (Kaboré) បច្ចុប្បន្ននៅទីណាគេមិនទាន់ដឹងនៅឡើយ ប៉ុន្តែភ្នាក់ងារសារព័ត៌មាន AFP រាយការណ៍ថា គាត់ត្រូវបានទាហានចាប់ខ្លួននៅយប់ថ្ងៃអាទិត្យ។ បើទោះបីជាមានការបាញ់កាំភ្លើងយ៉ាងខ្លាំងក្លាត្រូវបានរាយការណ៍នៅទូទាំងរដ្ឋធានីអៅហ្កាឌូហ្គូនៅយប់ថ្ងៃអាទិត្យក៏រដ្ឋាភិបាលបានបដិសេធលើការប៉ុនប៉ងធ្វើរដ្ឋប្រហារ ឬថាលោកកាប័រត្រូវបានឃុំខ្លួន។ បើយោងតាមការចុះផ្សាយរបស់សារព័ត៌មាន AP បានឲ្យដឹងថា ចំណងជើងព័ត៌មានចុះផ្សាយលើកញ្ចក់ទូរទស្សន៍រដ្ឋ RTB មានខ្លឹមសារថា៖ “សកម្មភាពមិនសប្បាយចិត្តរបស់ទាហាន ហើយមេដឹកនាំយោធាកំពុងធ្វើការដោះស្រាយស្ថានការណ៍ឲ្យមានភាពស្ងប់ស្ងាត់ និងសម្រួលឲ្យគ្មានបញ្ហា”។
ទាហានខ្លះបានប្រាប់ភ្នាក់ងារសារព័ត៌មាន AP ថា ពួកគេបានរៀបចំផែនការបះបោរចាប់តាំងពីខែសីហា ហើយពួកគេបានខឹងសម្បារចំពោះការបរាជ័យជាក់ស្តែងរបស់លោកកាប័រក្នុងការប្តេជ្ញាចិត្តសាងកម្លាំង និងបន្ថែមធនធានក្នុងការប្រយុទ្ធប្រឆាំងនឹងក្រុមសកម្មប្រយុទ្ធជីហាដ។ខណៈដែលការបាញ់កាំភ្លើងបានផ្ទុះឡើងនៅរដ្ឋធានីអៅហ្កាឌូហ្គូ ជនស៊ីវិលត្រូវបានរាយការណ៍ថាចូលរួមធ្វើការតវ៉ាដោយសាមគ្គីជាមួយក្រុមយោធាទាំងនោះ។
សេចក្តីថ្លែងការណ៍មួយចេញផ្សាយនៅថ្ងៃចន្ទបានបញ្ជាក់ឲ្យដឹងថា គណបក្សនយោបាយរបស់លោកកាប័រ People’s Movement for Progress បានអះអាងថា លោកប្រធានាធិបតីបានរត់រួចរស់រានមានជីវិតពីការប៉ុនប៉ងធ្វើឃាតក្នុងអំឡុងពេលមានការធ្វើរដ្ឋប្រហារ ហើយផ្ទះរបស់លោកត្រូវគេរឹបអូស។ យ៉ាងណាមិញ សមាជិកគណបក្សនេះមិនបានផ្តល់ព័ត៌មានបន្ថែមពីទីតាំងលាក់ខ្លួនរបស់លោកប្រធានាធិបតីនោះទេ។
សូមរំលឹកផងដែរថា លោកកាប័រ បានដឹកនាំប្រទេសបួគីណាហ្វាសូ ចាប់ពីឆ្នាំ២០១៥ មកក្រោយពេលដែលលោកត្រូវបានបោះឆ្នោតជ្រើសរើសឱ្យជំនួសលោកប្រធានាធិបតីប្លេស
ខាំផាវ(Blaise Compaoré) ដែលបានកាន់អំណាចចាប់តាំងពីឆ្នាំ១៩៨៧។ ក្រោយមកទៀតលោកកាប័រ ត្រូវបានគេបោះឆ្នោតជ្រើសរើសម្តងទៀតក្នុងខែវិច្ឆិកា ឆ្នាំ២០២០ ប៉ុន្តែលោកបានស្ថិតក្រោមសម្ពាធកាន់តែខ្លាំងចាប់តាំងពីពេលនោះមកក្នុងការដោះស្រាយបញ្ហានៃអំពើហិង្សារបស់ក្រុមសកម្មប្រយុទ្ធជីហាដ ដែលបានញាំញីប្រទេសបួគីណាហ្វាសូ និងតំបន់ស្ហាហេល កាន់តែទូលំទូលាយចាប់តាំងពីឆ្នាំ២០១៦មក ហើយភាគច្រើនការវាយប្រហារដឹកនាំដោយក្រុមសកម្មប្រយុទ្ធប៉ូកូហារ៉ាម និងក្រុមសកម្មប្រយុទ្ធអាល់កៃដាក្នុងស្រុក៕
ប្រែសម្រួល៖ប៉ោក លក្ខិណា
ប្រភពព័ត៌មាន RT ចុះផ្សាយថ្ងៃទី២៤ ខែមករា ឆ្នាំ២០២២
