ប្រទេសសីរ៉ី៖ជនស៊ីវិល ១០នាក់ស្លាប់ និង៣២នាក់រងរបួស ក្នុងហេតុការណ៍ទម្លាក់គ្រាប់បែកប្រឆាំងគ្នាទៅវិញទៅមករវាងកម្លាំងតួកគី និងក្រុមភេរវករស៊ីឈ្នួលរបស់ពួកគេចេញពីតំបន់ម្ខាង ជាមួយនឹងក្រុមសកម្មប្រយុទ្ធចេញពីតំបន់ម្ខាងទៀតក្នុងទីក្រុងអាល់បាបនៅភាគខាងជើងទីក្រុងអាឡិបប៉ូ។
ប្រភពព័ត៌មានក្នុងស្រុក និងរបាយការណ៍ពីប្រព័ន្ធផ្សព្វផ្សាយទុកចិត្តបាន បានលើកឡើងមានខ្លឹមសារថា ការទម្លាក់គ្រាប់បែកប្រឆាំងគ្នាតាមរយៈគ្រាប់រ៉ូក្កែត និងកាំភ្លើងធំធុនធ្ងន់ រវាងកម្លាំងតួកគី និងក្រុមសកម្មប្រយុទ្ធ QSD គាំទ្រដោយសហរដ្ឋអាមេរិកនៅតែបន្តកើតឡើងជាច្រើនម៉ោងបន្ថែមទៀតរហូតដល់ពេលព្រឹក។
ប្រភពព័ត៌មានដដែលបញ្ជាក់ឲ្យដឹងថា គ្រាប់រ៉ូក្កែតមួយចំនួនបានធ្លាក់លើតំបន់លំនៅឋានក្នុងទីក្រុងអាល់បាបនៅភាគខាងជើងទីក្រុងអាឡិបប៉ូ ដោយបានសម្លាប់មនុស្ស ១០នាក់។ គេរំពឹងថា ចំនួនអ្នកស្លាប់ពីហេតុការណ៍បាញ់ផ្លោងនឹងកើនឡើង ខណៈដែលការទម្លាក់គ្រាប់បែកទៅវិញទៅមកមានលក្ខណៈខ្លាំងក្លា៕
ប្រែសម្រួល៖ប៉ោក លក្ខិណា
ប្រភពព័ត៌មាន sana ចុះផ្សាយថ្ងៃទី០២ ខែកុម្ភៈ ឆ្នាំ២០២២