ប្រទេសនីហ្សេរីយ៉ា៖មន្រ្តីប៉ូលិសនិយាយថា យ៉ាងហោចណាស់មានមនុស្ស៣នាក់ត្រូវបានសម្លាប់នៅព្រឹកថ្ងៃអាទិត្យ បន្ទាប់ពីមានការវាយប្រហារដោយក្មាន់កាំភ្លើងដែលបានឈ្លានពានលើភូមិចំនួន២នៅក្នុងប្រទេសនីហ្សេរីយ៉ា។
នៅថ្ងៃចន្ទ លោកបាឡាកូរីយ៉ា ប្រធានប៉ូលិសនីហ្សេរីយ៉ា បានប្រាប់អ្នកយកការណ៍នៅក្នុងរាជធានីមីណាថា កម្លាំងប៉ូលិសបានបើកប្រតិបត្តិការស៊ើបអង្កេត និងតាមប្រមាញ់ក្មាន់កាំភ្លើង ដែលបានជិះម៉ូតូចូលទៅក្នុងភូមិអិបបូ និងភូមិអេនដាបេហ្គី នៅក្នុងស្រុកឡាវ៉ុន។
លោកកូរីយ៉ាបានបន្ថែមឲ្យដឹងថា គោលបំណងនៃការវាយប្រហារគឺមិនទាន់ដឹងនៅឡើយទេ ដោយលោកបានបញ្ជាក់ទៀតថា ក្មាន់កាំភ្លើងបានធ្វើដំណើរសម្រុកចូលទៅក្នុងភូមិនៅម៉ោងប្រមាណជា ៥ព្រឹក ដើម្បីធ្វើរឿងមិនល្អផ្សេងៗ។
បើយោងតាមការអះអាងរបស់ប្រធានប៉ូលិសរូបនោះ កម្លាំងប៉ូលិស និងកម្លាំងយោធាត្រូវបានពង្រាយទៅកាន់តំបន់នោះ និងបានបើកប្រតិបត្តិការដើម្បីតាមប្រមាញ់ឧក្រិដ្ឋជនទាំងនោះ។
លោកប្រាប់បន្ថែមទៀតថា៖ “យើងបានអំពាវនាវដល់ប្រជាពលរដ្ឋឲ្យជួយដល់បុគ្គលិកសន្តិសុខដែលបានដាក់ពង្រាយជាមួយនឹងព័ត៌មានដែលអាចទុកចិត្តបាន ដែលអាចជួយដល់ការចាប់ខ្លួនជនខិលខូច។ ”
គួរបញ្ជាក់ផងដែរថា ការវាយប្រហារប្រដាប់អាវុធ បានក្លាយជាការគំរាមកំហែងសុវត្ថិភាពនៅក្នុងតំបន់ភាគខាងជើង និងតំបន់កណ្តាលរបស់ប្រទេសនីហ្សេរីយ៉ា ដែលនាំឱ្យមានការស្លាប់ និងការចាប់ជំរិតនៅរយៈពេលប៉ុន្មានខែថ្មីៗកន្លងមកនេះ៕
ប្រែសម្រួល៖ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី២៧ ខែកុម្ភៈ ឆ្នាំ២០២២
