ប្រទេសតួកគី៖ មន្ត្រីក្រសួងការពារជាតិតួកគីនិយាយនៅថ្ងៃចន្ទថា កម្លាំងសន្តិសុខតួកគីសម្លាប់សមាជិករបស់អង្គភាពការពារប្រជាជនឃឺដស៊ីរី (YPG) ៤នាក់ នៅភាគខាងជើងប្រទេសស៊ីរី។
មន្ត្រីក្រសួងបានផុសនៅលើបណ្តាញសង្គមធ្វីតធ័រមានខ្លឹមសារថា សមាជិករបស់អង្គភាពការពារប្រជាជនឃឺដស៊ីរីគឺមានស្ថានភាពជ្រុលនិយម ក្រោយពីពួកគេបានបើកការបាញ់ប្រហារ និងបានប៉ុនប៉ងជ្រៀតចូលទៅក្នុងតំបន់ Operation Peace Spring របស់ប្រទេសតួកគីនៅភាគខាងជើងប្រទេសស៊ីរី។
នៅក្នុងសារដដែលរបស់មន្ត្រីសួងលើបណ្តាញសង្គមធ្វីតធ័រមានបន្ថែមខ្លឹមសារថា យ៉ាងណាមិញ កម្លាំងតួកគីបានបើកការវាយប្រហារតាមអាកាសសម្លាប់សមាជិក
បក្សពលករឃឺដ (PKK) ជ្រុលនិយម១នាក់ នៅក្នុងប្រតិបត្តិការ Operation Claw Tigerនៅភាគខាងជើងប្រទេសអ៊ីរ៉ាក់។
អាជ្ញាធរតួកគីជាញឹកញាប់បានប្រើពាក្យ “ជ្រុលនិយម” ដោយចង់សំដៅដល់ “ក្រុមភេរវករ” ដែលត្រូវបានសម្លាប់ រងរបួស និងត្រូវបានចាប់ខ្លួននៅក្នុងប្រតិបត្តិការរបស់ពួកគេ។
គួររំលឹកផងដែរថា កម្លាំងតួកគីបានបន្តប្រតិបត្តិការវាយលុកនៅភាគខាងជើងប្រទេសអ៊ីរ៉ាក់នៅរយៈពេលប៉ុន្មានឆ្នាំកន្លងមកនេះ។ នៅខែមិថុនាឆ្នាំមុននេះ កម្លាំងតួកគីបានបើកប្រតិបត្តិការថ្មីមួយលើដីដែលមានឈ្មោះថា “Operation Claw Tiger” ដោយបានកំណត់គោលដៅលើទីតាំងរបស់សមាជិកគណបក្សពលករឃឺដនៅក្នុងខេត្តស៊ីនចា ខេត្តការ៉ាកាក ខេត្តហ្សាប ខេត្តអាវ៉ាស៊ីនបេសយ៉ាន និងខេត្តហាគុក។ ចំណែកឯ សមាជិកគណបក្សពលករឃឺដបានប្រើប្រាស់ភ្នំឃ្វានឌីរបស់ប្រទេសអ៊ីរ៉ាក់ជាមូលដ្ឋានសំខាន់របស់ពួកគេនៅរយៈពេលប៉ុន្មានឆ្នាំកន្លងមកនេះ។
រីឯ កម្លាំងតួកគី និងសមាជិករបស់អង្គភាពការពារប្រជាជនឃឺដស៊ីរី ជាញឹកញាប់បានបាញ់គ្នា ទៅវិញទៅមកនៅលើព្រំដែនប្រទេសស៊ីរី ហើយភាពតានតឹងក៏បានកើនឡើងក្នុងតំបន់ចាប់តាំងពីដើមខែមករាមក ក្រោយពីមានការសម្លាប់ទាហានតួកគី ៣នាក់។
គួរបញ្ជាក់បន្ថែមផងដែរថា ទីក្រុងអង់ការ៉ា បានចាត់ទុកសមាជិករបស់អង្គភាពការពារប្រជាជនឃឺដស៊ីរី (YPG) ជាសាខារបស់បក្សពលករឃឺដ (PKK)។ ខណៈដែលបក្សពលករឃឺដ (PKK) ដែលត្រូវបានចាត់ទុកថាជាអង្គភាពភេរវករដោយប្រទេសតួកគី សហរដ្ឋអាមេរិក និងសហភាពអ៊ឺរ៉ុប បានធ្វើការបះបោរប្រឆាំងនឹងរដ្ឋាភិបាលតួកគីអស់រយៈពេលជាងបីទសវត្សរ៍មកហើយ ហើយថែមទាំងបានសម្លាប់មនុស្សច្រើនជាង៤០ ០០០នាក់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៨ ខែកុម្ភៈ ឆ្នាំ២០២២