ប្រទេសអ៊ីស្រាអែល៖ ប៉ូលិសអ៊ីស្រាអែលនិយាយថា មនុស្ស៤នាក់ត្រូវបានសម្លាប់នៅថ្ងៃអង្គារដោយអ្នកវាយប្រហារអារ៉ាប់ម្នាក់ ហើយក្រោយមកអ្នកដំណើរបានបាញ់សម្លាប់អ្នកវាយប្រហារនោះនៅក្នុងទីក្រុងបៀរស្ហេបា។
ប៉ូលិសនិយាយនៅក្នុងសេចក្តីថ្លែងការណ៍មួយមានខ្លឹមសារថា ជនដៃដល់ចាក់ស្ត្រីម្នាក់ឱ្យស្លាប់នៅស្ថានីយប្រេង បន្ទាប់ពីជនដៃដល់ដើរចេញពីរថយន្តនៅក្បែរផ្សារទំនើបក្នុងទីក្រុងបៀរស្ហេបា។ ក្រោយមកទៀត ជនដៃដល់រូបនោះបានដើរត្រលប់ទៅរថយន្តរបស់គាត់វិញ និងបានបើករថយន្តទៅបុកអ្នកជិះកង់មុនពេលចុះពីឡានម្ដងទៀត ដើម្បីទៅចាក់បុរសម្នាក់ និងស្ត្រីម្នាក់ផ្សេងទៀត។
ព័ត៌មានទូរទស្សន៍រដ្ឋ រាយការណ៍ថាអ្នកវាយប្រហារគឺជាជនជាតិអារ៉ាប់អ៊ីស្រាអែល
និងជាអ្នកស្រុកបេឌូអ៊ីននៃភូមិហូរ៉ាក្នុងនៅតំបន់ណេហ្គេវដេសឺត។ ពីមុនមកគាត់ធ្លាប់ជាប់ពន្ធនាគារជាប់ចោទពីបទថាមានទំនាក់ទំនងជាមួយក្រុមភេរវជនរដ្ឋឥស្លាម។
ពុំទាន់មានក្រុមណាមួយចេញមុខអះអាងទទួលខុសត្រូវចំពោះការវាយប្រហារដែលជាការវាយប្រហារសាហាវបំផុតក្នុងប្រទេសអ៊ីស្រាអែលក្នុងរយៈពេលប៉ុន្មានឆ្នាំកន្លងមកនេះ។
អ្នកនាំពាក្យប៉ូលិស លោក អេលីឡេវី ប្រាប់ទូរទស្សន៍បុស្តិ៍លេខ១៣ថា ឧបទ្ទវហេតុនេះហាក់ដូចជា សកម្មភាពរបស់ភេរវករបុគ្គលម្នាក់ដែលនិយមលើការចាក់សម្លាប់។ ប៉ូលិសបានបញ្ជាក់ឲ្យដឹងថា កម្លាំងសមត្ថកិច្ចបានចុះឆែកឆេរនៅតំបន់នោះ ដើម្បីស្វែងរកអ្នកសមគំនិតដែលមានជាប់ពាក់ព័ន្ធ។
ក្រោយពីហេតុការណ៍នោះបានកើតឡើង នាយករដ្ឋមន្រ្តីអ៊ីស្រាអែល លោក ណាហ្វថាលី
ប៊ែនណេត បានកោះប្រជុំសន្តិសុខជាមួយរដ្ឋមន្ត្រីសន្តិសុខផ្ទៃក្នុង និងប្រធានប៉ូលិស នេះបើយោងតាមសេចក្តីថ្លែងការណ៍ចេញពីការិយាល័យនាយករដ្ឋមន្ត្រី៕
ប្រែសម្រួល៖ប៉ោក លក្ខិណា
ប្រភពព័ត៌មាន xinhuanet ចុះផ្សាយថ្ងៃទី២៣ ខែមីនា ឆ្នាំ២០២២