ប្រទេសអ៊ីរ៉ាក់៖ រដ្ឋាភិបាលអ៊ីរ៉ាក់និយាយថា ក្រុមសកម្មប្រយុទ្ធ៤នាក់របស់ក្រុមសកម្មប្រយុទ្ធរដ្ឋអ៊ីស្លាម IS ត្រូវបានសម្លាប់នៅថ្ងៃព្រហ្បតិ៍ក្នុងហេតុការណ៍វាយប្រហារតាមអាកាសទៅលើតំបន់ខ្ពង់រាបនៅក្នុងខេត្តសាឡាហ៊ូឌីនភាគខាងជើងរដ្ឋធានីបាដាដ។
បើតាមសេចក្តីថ្លែងការណ៍របស់សហព័ន្ធចារកម្ម និងភ្នាក់ងារស៊ើបអង្កេតនៃក្រសួងមហាផ្ទៃបានឱ្យដឹងថា របាយការណ៍ស៊ើបការណ៍សម្ងាត់មានបញ្ជាក់ខ្លឹមសារថា កម្លាំងប្រដាប់អាវុធអ៊ីរ៉ាក់បានបើកការវាយប្រហារតាមអាកាសលើផ្ទះដែលគេបោះបង់ចោលច្រើនខ្នងនៅក្នុងតំបន់អាល់អ៊ីតភាគខាងកើតនៃខេត្ត និងបានសម្លាប់សមាជិកក្រុមសកម្មប្រយុទ្ធរដ្ឋអ៊ីស្លាម ចំនួន៤នាក់។
រយៈពេលប៉ុន្មានខែមកនេះ កម្លាំងសន្តិសុខអ៊ីរ៉ាក់បានបង្កើនការវាយប្រហារយ៉ាងសាហាវប្រឆាំងនឹងក្រុមសកម្មប្រយុទ្ធរដ្ឋអ៊ីស្លាម ដើម្បីបង្ក្រាបសកម្មភាពរបស់ពួកគេ។
គួរបញ្ជាក់ផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងជាងមុន ចាប់តាំងពីកម្លាំងសន្តិសុខអ៊ីរ៉ាក់បានកម្ចាត់ក្រុមសកម្មប្រយុទ្ធរដ្ឋអ៊ីស្លាមក្នុងឆ្នាំ២០១៧។ ទោះបីជាយ៉ាងណាក៏ដោយក្រុមសកម្មប្រយុទ្ធរដ្ឋអ៊ីស្លាមដែលនៅសេសសល់បានបង្កប់ខ្លួននៅតាមទីក្រុង តំបន់វាលខ្សាច់ និងតំបន់ខ្ពង់រាបផ្សេងទៀតដោយបានធ្វើការវាយឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២២ ខែមេសា ឆ្នាំ២០២២
