ប្រទេសតួកគី៖ ទាហានតួកគី២នាក់ត្រូវបានសម្លាប់នៅថ្ងៃអង្គារក្នុងប្រតបត្តិការប្រឆាំងនឹងគណបក្សពលករឃឺដ (PKK) ខុសច្បាប់នៅភាគខាងជើងប្រទេសអ៊ីរ៉ាក់។
មន្រ្តីក្រសួងការពារជាតិតួកគីបាននិយាយថា ទាហានម្នាក់ត្រូវបានសម្លាប់ និង៤នាក់ផ្សេងទៀតរងរបួសនៅក្នុងការវាយប្រហារដោយគ្រាប់រ៉ូកែតរបស់សមាជិកគណបក្សពលករឃឺដនៅក្នុងប្រតិបត្តិការដែលកំពុងដំណើរការដែលត្រូវបានគេហៅថាខ្លរឡក់។ ទាហានរងរបួសម្នាក់ក្នុងចំណោមទាហានរងរបួសទាំងអស់បានស្លាប់នៅមន្ទីរពេទ្យពេលបញ្ចូនទៅដល់មន្ទីពេទ្យ។
ការវាយប្រហាររបស់យោធាតួកគីនៅភាគខាងជើងប្រទេសអ៊ីរ៉ាក់ ដែលបានចាប់ផ្តើមនៅថ្ងៃ
ទី១៨ ខែមេសា បានសំដៅទៅលើជំរក លេណដ្ឋាន រូងភ្នំ ឃ្លាំងរំសេវ និងទីស្នាក់ការប្រចាំតំបន់នៅតំបន់មេធីណា ហ្សាប និងអាវ៉ាស៊ីនបេសៀន របស់សមាជិកគណបក្ស
ពលករឃឺដ។
កម្លាំងតួកគីធ្វើប្រតិបត្តិការឆ្លងដែនជាប្រចាំលើមូលដ្ឋានគណបក្សពលករឃឺដនៅភាគខាងជើងនៃប្រទេសអ៊ីរ៉ាក់។ គួរបញ្ជាក់ផងដែរថា គណបក្សពលករឃឺដដែលបានចុះក្នុងបញ្ចីអង្គការភេរវករដោយប្រទេតួកគី បានបះបោរប្រឆាំងរដ្ឋាភិបាលតួកគីអស់រយៈពេលច្រើនជាង៣០ឆ្នាំមកហើយ។
កម្លាំងអ៊ីរ៉ាក់បានតវ៉ាប្រឆាំងនឹងប្រតិបត្តិការចុងក្រោយរបស់កម្លាំងតួកគីនៅភាគខាងជើងប្រទេសអ៊ីរ៉ាក់ថាជាការរំលើភបំពានលើអធិបតេយ្យភាពរបស់ប្រទេសអ៊ីរ៉ាក់ ប៉ុន្តែប្រទេសតួកគីបានការពារថាជាសកម្មភាពរបស់ពួកគេមានគោលបំណងរក្សាសន្តិសុខព្រំដែននៃប្រទេសតួកគី៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៦ ខែមេសា ឆ្នាំ២០២២