សេចក្តីថ្លែងការណ៍បាននិយាយកាលពីថ្ងៃអាទិត្យនេះថា មានហេតុការណ៍វាយប្រហារដោយគ្រាប់រ៉ូកែតមួយបានកើតឡើងលើមូលដ្ឋានតួកគី និងទីតាំងរបស់កងកម្លាំងប៉េសមឺហ្គា(Peshmerga) ដែលស្ថិតនក្នុងតំបន់ឃឺដ ភាគខាងជើងប្រទេសអ៊ីរ៉ាក់។
កងកម្លាំងប្រឆាំងភេរវកម្មក្នុងតំបន់ឃឺដ បាននិយាយនៅក្នុងសេចក្តីថ្លែងការណ៍មួយថា គ្រាប់រ៉ូកែតចំនួន២គ្រាប់ធ្លាក់នៅជិតកងពលតូចលេខ១១២ របស់កងកម្លាំងប៉េសមឺហ្គា ហើយពីរគ្រាប់ផ្សេងទៀតធ្លាក់នៅខាងក្រៅមូលដ្ឋានហ្សីលកាន (Zilkan) ដែលជាទីតាំងលំនៅដ្ឋានរបស់កងកម្លាំងទួរគីក្នុងទីក្រុងនីនីវ៉ា (Ninevah)។
យោងតាមសេចក្តីថ្លែងការណ៍មិនទាន់មានការរាយការណ៍អំពីអ្នករងរបួស ឬខូចខាតសម្ភារៈនៅឡើយទេ។
គួររំលឹកផងដែរថាមូលដ្ឋានហ្សីលកាន ត្រូវបានគេកំណត់គោលដៅវាយប្រហារដោយគ្រាប់រ៉ូកែត និងយន្តហោះគ្មានមនុស្សបើកផ្ទុកគ្រឿងផ្ទុះយ៉ាងហោចណាស់ ៧ដងចាប់តាំងពីខែមករាឆ្នាំនេះ។
ទោះបីជាមិនទាន់មានក្រុម ឬអង្គការណាមួយចេញមុខអះអាងទទួលខុសត្រូវចំពោះឧបទ្ទវហេតុនេះជាផ្លូវការក៏ដោយ ប៉ុន្តែក្រុមជីវពលគាំទ្រដោយអ៊ីរ៉ង់ តែងតែត្រូវបានគេគិតថាជាក្រុមដែល នៅពីក្រោយការវាយប្រហារបែបនេះនៅក្នុងប្រទេសអ៊ីរ៉ាក់។
អ្នកប្រែសម្រួល៖ គល់ សេងហាក់
ប្រភពព័ត៌មានពី basnews ចេញផ្សាយថ្ងៃទី២៦ ខែមិថុនា ឆ្នាំ២០២២
