ប្រទេសអេត្យូពី៖ មន្រ្តីអេត្យូពីបាននិយាយកាលពីថ្ងៃព្រហស្បតិ៍ថា ជនសង្ស័យជាក្រុមឧទ្ទាមអូរូម៉ូ លីបឺរេស្ហិន អាមី (Oromo Liberation Army) ដែលហៅកាត់ថា អូអិលអេ (OLA) វាយប្រហារលើមនុស្សយ៉ាងហោចណាស់ ៣៨៨នាក់។
លោកស្រី ប៉េលៀន សេយ៉ូម លេខាធិការសារព័ត៌មាននៃការិយាល័យនាយករដ្ឋមន្ត្រីអេត្យូពីអាបៀរ អាមិដ និយាយទៅកាន់អ្នកការសែតថា ទិន្ន័យដែលលោកស្រីទទួលបានពីតំបន់
អូរូមៀរនៃប្រទេសអេត្យូពីកាលពីថ្ងៃពុធមានការបញ្ជាក់ថា យ៉ាងហោចណាស់មានជនរងគ្រោះ ៣៣៨នាក់ពីការវាយប្រហារចុងក្រោយ។
ការវាយប្រហារប្រដាប់អាវុធផ្តោតគោលដៅសំខាន់លើកសិករជនជាតិភាគតិច អាំហារារ កាលពីថ្ងៃទី១៨ ខែមិថុនា នៅក្នុងតំបន់ថូលនៃស្រុកហ្គីមប៊ី នៅភាគខាងលិចនៃតំបន់វ៉ូឡេហ្គា នៃតំបន់អូរូមៀរ បណ្តាលឱ្យជនស៊ីវិលជាច្រើននាក់ស្លាប់។
មន្ត្រីរដ្ឋាភិបាលអេត្យូពី និងអ្នកដែលរួចផុតពីការវាយប្រហារ បានចោទប្រកាន់លើអ្នកប្រយុទ្ធអូអិលអេ (OLA) ពីការវាយប្រហារកាលពីចុងសប្តាហ៍ ហើយការចោទប្រកាន់នោះត្រូវបានក្រុមឧទ្ទាមបដិសេធ។ លោកស្រី សេយ៉ូមនិយាយថា ទាហានអេត្យូពីបានបង្កើនប្រតិបត្តិការសន្តិសុខរបស់ខ្លួនប្រឆាំងនឹងក្រុមឧទ្ទាមអូអិលអេ ក្រោយពីមានការវាយប្រហារដ៏សាហាវ។ លោកស្រីក៏បានបន្ថែមឱ្យដឹងផងដែរថា សន្តិសុខ និងសន្តិភាពរបស់ប្រទេសអេត្យូពីកំពុង ប្រឈមនឹងបញ្ហាប្រឈមដោយតួអង្គផ្ទៃក្នុងសមគំនិតជាមួយនឹងតួអង្គខាងក្រៅ។
គួរបញ្ជាក់ផងដែរថា ក្រុមឧទ្ទាមអូអិលអេ គឺជាក្រុមបំបែកខ្លួនចេញពីអតីតក្រុមឧទ្ទាមអូរ៉ូមមូលីបឺរេស្ហិន ហ្វ្រាន់ (OLF) ។ ក្រុមឧទ្ទាមអូអិលអេ មានសមាជិកប្រមាណជា ៣,០០០នាក់ ធ្វើប្រតិបត្តិការនៅភាគខាងលិច និងភាគខាងត្បូងតំបន់អូរ៉ូមៀ ដែលជាមាតុភូមិរបស់ជនជាតិដើមភាគតិចអូរូម៉ូស និងមានសមាជិកចំនួនប្រមាណជា ៣៥ភាគរយនៃប្រជាជនអេត្យូពី។
នៅខែឧសភា ឆ្នាំ២០២១ សភាអេត្យូពីបានបោះឆ្នោតចាត់ទុកថាក្រុមឧទ្ទាមអូអិលអេគឺជាក្រុមភេរវករ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០១ ខែកក្កដា ឆ្នាំ២០២២
