ប្រទេសតាហ្ស៊ីគីស្ថាន៖ភ្នាក់ងារសារព័ត៌មានរដ្ឋបានរាយការណ៍ថា កាលពីថ្ងៃចន្ទ ប្រទេសស៊ីរីបានប្រគល់ជនជាតិតាហ្ស៊ីគីស្ថានសរុបចំនួន ១៤៦នាក់ ដែលជាសមាជិកគ្រួសាររបស់ក្រុមសកម្មប្រយុទ្ធរដ្ឋអ៊ីស្លាម(IS) ទៅផ្ទះរបស់ពួកគេវិញ។
លោក ហ្សាប៊ីដូឡាស់ ហ្សាប៊ីដូវ ឯកអគ្គរដ្ឋទូតតាហ្ស៊ីគីស្ថានប្រចាំនៅប្រទេសកូវ៉ែត ស្ថិតនៅក្នុងប្រទេសស៊ីរីកាលពីថ្ងៃចន្ទដើម្បីបញ្ជូនជនជាតិតាហ្ស៊ីគីស្ថាន ដែលស្នាក់ក្នុងជំរុំ អាល់ ហូល នៅភាគឦសានប្រទេសស៊ីរី។
ជំរុំ អាល់ ហូល ដែលគ្រប់គ្រងដោយកម្លាំងប្រជាធិបតេយ្យស៊ីរីឃឺដ ដែលហៅកាត់ថា (SDF) ត្រូវបានគេស្គាល់ថាជាជម្រកស្នាក់អាស្រ័យរបស់ជនភៀសខ្លួន ដែលភាគច្រើនគឺជាសមាជិកគ្រួសាររបស់ក្រុមសកម្មប្រយុទ្ធរដ្ឋអ៊ីស្លាម(IS)។
លោកហ្សាប៊ីដូវ និយាយថា ភាគីប្រទេសតាហ្ស៊ីស្ថាន បានចាត់វិធានការ និងរៀបចំរាល់កិច្ចការចាំបាច់ទាំងអស់សម្រាប់ការការវិលត្រលប់របស់ជនជាតិតាហ្ស៊ីគីស្ថានទៅកាន់ប្រទេសរបស់ពួកគេវិញ។
លោកបានសាទរចំពោះកិច្ចសហប្រតិបត្តិការ និងការគាំទ្រ ដែលបានផ្តល់ដោយអាជ្ញាធរស៊ីរីដើម្បីធានាដល់ការដឹកជញ្ជូនកុមារ និងស្ត្រី ចេញពីជំរំ អាល់ ហូល ទៅកាន់អាកាសយានដ្ឋានអន្តរជាតិដាម៉ាស ដែលអាចឱ្យពួកគេជិះយន្តហោះត្រលប់ទៅដល់ផ្ទះវិញ។
ដំណើរការនេះបានធ្វើឡើងក្នុងកិច្ចសហប្រតិបត្តិការរវាងក្រសួងការបរទេសស៊ីរី និងភ្នាក់ងារអឌ្ឍចន្ទក្រហមអារ៉ាប់ស៊ីរី៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៦ ខែកក្កដា ឆ្នាំ២០២២