ប្រទេសសូម៉ាលី៖មន្ត្រីយោធានិយាយថា យ៉ាងហោចណាស់មនុស្ស ១០នាក់ត្រូវបានសម្លាប់ និងមួយចំនួនផ្សេងទៀតរងរបួសកាលពីថ្ងៃពុធ នៅពេលដែលអ្នកបំផ្ទុះគ្រាប់បែកអត្តឃាតបានបំផ្ទុះខ្លួនឯងក្នុងទីក្រុងម៉ាកា នៅតំបន់ឡូវើរ ស្ហារបេល ភាគខាងត្បូងប្រទេសសូម៉ាលី។
លោក អាប់ ដូលឡាហ៊ី អាលី មន្ត្រីទ័ពជាតិសូម៉ាលីនិយាយថា លោក អាប់ដូលឡាហ៊ី អាលីវ៉ាហ្វូវ ស្នងការស្រុកម៉ាកា បានស្ថិតក្នុងចំណោមអ្នកស្លាប់នៅក្នុងការវាយប្រហារចុងក្រោយ។ លោកអាលីប្រាប់ភ្នាក់ងារសារព័ត៌មានតាមទូរស័ព្ទថា៖ “អ្នកបំផ្ទុះគ្រាប់បែកអត្តឃាតបានបំផ្ទុះខ្លួនឯងនៅមុខទីស្នាក់ការកណ្តាលស្រុក។ លោកស្នងការនគរបាលស្រុកម្នាក់ស្ថិតក្នុងចំណោមអ្នកស្លាប់នៅក្នុងហេតុការណ៍បំផ្ទុះ។ ”
ក្រុមសកម្មប្រយុទ្ធអាល់ស្ហាបាប បានអះអាងទទួលខុសត្រូវចំពោះការវាយប្រហារនោះ ដោយនិយាយថា ក្រុមរបស់ពួកគេកំពុងកំណត់គោលដៅលើមន្ត្រីរដ្ឋាភិបាលនៅក្នុងតំបន់។
គួររំលឹកផងដែរថា ក្រុមសកម្មប្រយុទ្ធជ្រុលនិយមនៅតែបន្តគ្រប់គ្រងលើតំបន់ជនបទមួយចំនួននៅភាគខាងត្បូង និងកណ្តាលប្រទេសសូម៉ាលី និងបន្តធ្វើការវាយប្រហារធំៗ នៅក្នុងទីក្រុងម៉ុងហ្កាឌីស្យុ និងកន្លែងផ្សេងទៀត។ កម្លាំងសម្ព័ន្ធមិត្តបានបង្កើនប្រតិបត្តិការយោធាចូលទៅក្នុងទឹកដីដែលធ្លាប់គ្រប់គ្រងដោយក្រុមសកម្មប្រយុទ្ធអាល់ស្ហាបាប ដែលធ្លាប់ត្រូវបាន បានបណ្តេញចេញពីទីក្រុងម៉ុងហ្កាឌីស្យុកាលពីឆ្នាំ២០១១៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៧ ខែកក្កដា ឆ្នាំ២០២២