ប្រទេសកេនយ៉ា៖កាលពីថ្ងៃព្រហ្បតិ៍ រដ្ឋាភិបាលកេនយ៉ាបានបញ្ចូនមន្ត្រីប៉ូលិស ១៩នាក់ទៅកាន់ប្រទេសសូម៉ាលីដើម្បីជួយពង្រឹងសមត្ថភាពរក្សាស្ថិរភាពនៅក្នុងប្រទេសនោះ។
លោក ប្រូណូ ស្ហីអូស្ហូ អ្នកនាំពាក្យប៉ូលិសបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃពុធនៅក្នុងទីក្រុងណៃរ៉ូប៊ីថា មន្ត្រីជាច្រើននាក់នឹងចូលរួមក្នុងបេសកកម្មរក្សាសន្តិភាពដែលកំពុងបន្តនៅក្រោមបេសកកម្មផ្លាស់ប្តូរសហភាពអាហ្វ្រិកនៅប្រទេសសូម៉ាលី (ATMIS) ក្នុងគោលបំណងលុបបំបាត់អំពើរហិង្សានៅក្នុងប្រទេស និងធានាដល់ការរួមរស់ដោយសន្តិភាព តាមរយៈការគាំទ្រការសន្ទនា ការបណ្តុះបណ្តាល ការណែនាំ ការប្រឹក្សា និងការចែករំលែកបទពិសោធន៍ផ្សេងៗ។
បើតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិបានឱ្យដឹងថា ក្រុមប៉ូលិស ATMIS នឹងមានបុគ្គលិក ១០៤០នាក់ រាប់បញ្ចូលទាំងអង្គភាពប៉ូលិសចំនួនប្រាំ (FPUs) និងរក្សាចំនួនបុគ្គលិកនោះរហូតដល់ខែធ្នូ ឆ្នាំ២០២៤។
លោកប្រូណូនិយាយថា មន្ត្រីប៉ូលិសជាច្រើននាក់ត្រូវគេរំពឹងថា នឹងគាំទ្រដល់ការបណ្តុះបណ្តាលឯកទេស ផ្តល់ការណែនាំ និងផ្តល់ការប្រឹក្សាដល់កម្លាំងប៉ូលិសសូម៉ាលី រាប់បញ្ចូលទាំងការយាមល្បាតរួមគ្នា និងកិច្ចការពារដំណើរការសំខាន់ៗផ្សេងទៀត។
មន្ត្រីដែលត្រូវបានបញ្ចូនចេញពីអង្គភាពនានានៅក្នុងអគ្គស្នងការនគរបាលជាតិនឹងចូលរួម ជាមួយបុគ្គលិកសន្តិសុខផ្សេងទៀតនៅក្នុងប្រទេសសូម៉ាលី ដែលកំពុងប្រយុទ្ធប្រឆាំងនឹងក្រុម សកម្មប្រយុទ្ធ អាល់ កៃដា ដែលជាសម្ព័ន្ធមិត្តជាមួយក្រុមសម្មប្រយុទ្ធ អាល់ ស្ហាបាប នៅក្នុងកិច្ចខិតខំប្រឹងប្រែងដើម្បីធានាស្ថិរភាព៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៨ ខែកក្កដា ឆ្នាំ២០២២
