ប្រទេសកាមេរូន៖ប្រភពព័ត៌មានក្នុងតំបន់ និងសន្តិសុខបានប្រាប់ឲ្យដឹងថា យ៉ាងហោចណាស់ក្រុមសកម្មប្រយុទ្ធបូកូហារ៉ាម ៣នាក់ ត្រូវបានសម្លាប់កាលពីព្រឹកថ្ងៃព្រហស្បតិ៍ បន្ទាប់ពីពួកគេប៉ុនប៉ងវាយប្រហារលើបុស្តិ៍យោធា នៅក្នុងតំបន់ហ្វាណ័សនៃប្រទេសកាមេរូន។ ការវាយប្រហារបានកើតឡើងនៅក្នុងតំបន់ណុកហ្គតឆេវី។
មន្ត្រីយោធាក្នុងតំបន់ម្នាក់ដែលសុំមិនបញ្ចេញឈ្មោះប្រាប់ភ្នាក់ងារសារព័ត៌មានថា ក្រុមសកម្មប្រយុទ្ធប្រដាប់អាវុធបានវាយឆ្មក់ និងវាយប្រហារលើកម្លាំងទ័ព ហើយនៅរយៈពេលជាច្រើនម៉ោងបន្ទាប់មកទៀត កម្លាំងទ័ពបានវាយបកទៅពួកគេវិញ ដោយបានសម្លាប់សមាជិកក្រុមសកម្មប្រយុទ្ធ ០៣នាក់នៅនឹងកន្លែង។ មន្ត្រីរូបនោះបន្ថែមឱ្យដឹងថា កម្លាំងយោធាកំពុងតាមចាប់ជនដៃដល់ដែលនៅសល់។
បើយោងតាមរបាយការណ៍សន្តិសុខ និងអង្គការក្រៅរដ្ឋាភិបាលនៅក្នុងតំបន់បានឱ្យដឹងថា ក្រុមសកម្មប្រយុទ្ធបូកូហារ៉ាមបានសម្លាប់មនុស្សច្រើនជាង ២០០០នាក់ ចាប់តាំងពីពួកគេចាប់ផ្តើមប្រតិបត្តិការវាយលុកនៅឆ្នាំ២០០៤៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៤ ខែសីហា ឆ្នាំ២០២២