ប្រទេសអ៊ីស្រាអែល៖មន្ត្រីក្រសួងការពារជាតិអ៊ីស្រាអែលនិយាយនៅក្នុងសេចក្តីថ្លែងការណ៍ថា ផ្លូវថ្មើរជើងសំខាន់រវាងប្រទេសអ៊ីស្រាអែល និងតំបន់ហ្កាហ្សាស្ទ្រីប រងការវាយប្រហារដោយគ្រាប់ផ្លោងដែលបាញ់ចេញពីតំបន់ឆ្នេរប៉ាឡេស្ទីន។
នៅក្នុងសេចក្តីថ្លែងការណ៍មានបន្ថែមខ្លឹមសារថា ផ្លូវថ្មើរជើង អេរ៉េស (Erez) ដែលបច្ចុប្បន្នជាផ្លូវឆ្លងកាត់តែមួយគត់រវាងតំបន់ហ្កាហ្សា និងប្រទេសអ៊ីស្រាអែលតាមផ្លូវគោក រងការវាយប្រហារដោយគ្រាប់បែកផ្លោង ៣គ្រាប់ ដែលបាញ់ដោយក្រុមសកម្មប្រយុទ្ធចេញពីតំបន់ហ្កាហ្សា។
មន្ត្រីក្រសួងបន្ថែមឱ្យដឹងថា ដំបូលស្ថានីយរងការខូចខាតដោយសារអគ្គិភ័យ ហើយគ្រាប់កាំភ្លើងបានធ្លាក់លើច្រកចូលទៅក្នុងសាល ខណៈដែលស្ថានីយនោះត្រូវបានគេប្រើដើម្បីសម្រួលដល់ការឆ្លងកាត់ប្រចាំថ្ងៃរបស់ប្រជាជនរាប់ពាន់នាក់នៅក្នុងតំបន់ហ្កាហ្សា ដែលចូលទៅធ្វើការនៅក្នុងប្រទេសអ៊ីស្រាអែល។
គួរបញ្ជាក់ផងដែរថា ប្រទេសអ៊ីស្រាអែលបានបិទច្រកឆ្លងកាត់កាលពីសប្តាហ៍មុន ចំពេលមានការផ្ទុះអាវុធដ៏ក្រើកមួយ ខណៈដែលកម្លាំងអ៊ីស្រាអែលបានបញ្ចេញការវាយប្រហារតាមអាកាសទ្រង់ទ្រាយធំកាលពីថ្ងៃសុក្រ ហើយក្រុមជីហាដអ៊ីស្លាមប៉ាឡេស្ទីនបានវាយបកទៅវិញដោយគ្រាប់រ៉ុក្កែតជាច្រើនគ្រាប់។
បើយោងតាមការបញ្ជាក់របស់ក្រសួងសុខាភិបាលប៉ាឡេស្ទីននៅក្នុងតំបន់ហ្កាហ្សាបានឱ្យដឹងថា ការប្រយុទ្ធគ្នាបានសម្លាប់ជនជាតិប៉ាឡេស្ទីនយ៉ាងហោចណាស់ ៣១នាក់ រាប់បញ្ចូលទាំងក្មេង ០៦នាក់ និងស្តី្រ ០៤នាក់ និងបណ្តាលឱ្យមនុស្ស ២៧៥នាក់របួស៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៧ ខែសីហា ឆ្នាំ២០២២
