ប្រទេសអារ៉ាប៊ីសាអូឌីត៖កាលពីថ្ងៃពុធ ប្រទេសអារ៉ាប៊ីសាអូឌីតបានបញ្ចូលឈ្មោះជនជាតិយេម៉ែន ៥នាក់នៅក្នុងបញ្ជីខ្មៅថាជាអ្នកឧបត្ថម្ភដល់ក្រុមភេរវករ ដោយសកម្មភាពរបស់ពួកគេមានជាប់ពាក់ព័ន្ធជាមួយក្រុមឧទ្ទាមហ៊ូធី។ យោងតាមសេចក្តីប្រកាសព័ត៌មានចេញដោយស្ថាប័នសន្តិសុខអារ៉ាប៊ីសាអូឌីតបានឱ្យដឹងថា ប្រធានសន្តិសុខរដ្ឋនៃប្រទេសអារ៉ាប៊ីសាអូឌីតបានចោទប្រកាន់ពួកគេពីបទបំពានច្បាប់ប្រទេស ក្នុងកិច្ចការប្រយុទ្ធប្រឆាំងនឹងឧក្រិដ្ឋកម្មភេរវកម្ម និងការផ្តល់ហិរញ្ញប្បទានរបស់ពួកគេ។
ប្រភពបន្ថែមថា ទ្រព្យសម្បត្តិរបស់ពួកគេទាំងអស់នៅក្នុងប្រទេសនឹងត្រូវជាប់គាំង ហើយបុគ្គលផ្សេងទៀត និងអង្គការនានានៅក្នុងប្រទេស ត្រូវជៀសវាងធ្វើប្រតិបត្តិការដោយផ្ទាល់ ឬដោយប្រយោលជាមួយពួកគេ។ បើយោងតាមសេចក្តីប្រកាសព័ត៌មានបញ្ជាក់ឱ្យដឹងថាជនជាតិយេម៉ែនទាំង ៥នាក់ត្រូវបានចោទប្រកាន់ពីបទល្មើសព្រហ្មទណ្ឌ ដោយរាប់បញ្ចូលទាំងការជួញដូរអាវុធពីប្រទេសអ៊ីរ៉ង់ទៅកាន់ប្រទេសយេម៉ែន ទទួលបានការបណ្តុះបណ្តាលនៅក្នុងប្រទេសអ៊ីរ៉ង់ គ្រប់គ្រងប្រតិបត្តិការដ្រូន និងគ្រាប់មីស៊ីលជាច្រើនទៀត។
ប្រទេសយេម៉ែនបានជាប់គាំងនៅក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលក្រុមឧទ្ទាមហ៊ូធីដែលគាំទ្រដោយអ៊ីរ៉ង់ដណ្តើមការគ្រប់គ្រងនៅខេត្តមួយចំនួនភាគខាងជើង និងបានបង្ខំឱ្យរដ្ឋាភិបាលយេម៉ែនដែលគាំទ្រដោយអារ៉ាប៊ីសាអូឌីតចេញពីរាជធានីសាណា។ ប្រទេសអារ៉ាប៊ីសាអូឌីត បានដឹកនាំកម្លាំងចម្រុះប្រឆាំងនឹងកងជីវពលហ៊ូធីនៅក្នុងប្រទេសយេម៉ែនចាប់តាំងពីឆ្នាំ២០១៥៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០១ ខែកញ្ញា ឆ្នាំ២០២២
