ប្រទេសអាហ្វហ្កានីស្ថាន៖លោក ខា លីដ ហ្សាដ្រាន អ្នកនាំពាក្យប៉ូលិស បាននិយាយថាមនុស្ស ៥នាក់រងរបួសក្នុងហេតុការណ៍ផ្ទុះដ៏កក្រើកចំនួន ២លើកនៅក្នុងតំបន់ ដាស់ អ៊ី បាជី ភាគខាងលិចទីក្រុងកាប៊ុលនៃប្រទេសអាហ្វហ្កានីស្ថាន កាលពីថ្ងៃសៅរ៍។
លោក ហ្សាដ្រាន ប្រាប់ភ្នាក់ងារសារព័ត៌មានថា៖ “គ្រឿងផ្ទុះកែច្នៃដែលបង្កប់នៅក្នុងកង់ចំនួន២ បានផ្ទុះឡើងនៅក្នុងតំបន់ ដាស់ អ៊ី បាជី កាលពីល្ងាច បណ្តាលឱ្យមនុស្ស ៥នាក់រងរបួស។ ” មន្ត្រីនិយាយថា ការស៊ើបអង្កេតកំពុងដំណើរការ។
យ៉ាងណាមិញ លោក អាប់ដុល ណាហ្វី ថាគ័រ អ្នកនាំពាក្យក្រសួងមហាផ្ទៃបានផុសលើបណ្តាញសង្គមទ្វីតធ័រមានខ្លឹមសារថា មនុស្សមួយចំនួនរងរបួសស្រាលនៅក្នុងហេតុការណ៍
ផ្ទុះទាំងពីរលើកនោះ។
ពុំទាន់មានក្រុម ឬបុគ្គលណាមួយអះអាងទទួលខុសត្រូវចំពោះការវាយប្រហារនេះទេ។
គួររំលឹកផងដែរថា កាលពីប៉ុន្មានថ្ងៃមុន មានហេតុការណ៍ផ្ទុះដ៏សាហាវមួយកើតឡើង នៅភាគខាងលិចទីក្រុង ហ៊ីរ៉ាត ដោយបានសម្លាប់មនុស្ស ១៨នាក់ និងបព្វជិតដ៏ល្បីល្បាញម្នាក់ រួមទាំងបណ្តាលឱ្យមនុស្ស ២៣នាក់ផ្សេងទៀតរងរបួស។ ក្រុមភេរវករដែស្ហ (ISIS) ឬក្រុមសកម្មប្រយុទ្ធរដ្ឋអ៊ីស្លាមបានអះអាងទទួលខុសត្រូវចំពោះការវាយប្រហារនេះ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១១ ខែកញ្ញា ឆ្នាំ២០២២
