ប្រទេសម៉ាលី៖របាយការណ៍របស់ការិយាល័យអង្គការសហប្រជាជាតិសម្រាប់សម្របសម្រួលកិច្ចការមនុស្សធម៌ (UNOCHA) ដែលចេញផ្សាយកាលពីថ្ងៃចន្ទនៅទីក្រុង ប៉ាម៉ាកូ នៃប្រទេសម៉ាលីមានបញ្ជាក់ខ្លឹមសារថា មនុស្សសរុប ៧២នាក់ ត្រូវបានសម្លាប់នៅក្នុងប្រទេសម៉ាលី ដោយហេតុការណ៍ផ្ទុះគ្រឿងផ្ទុះកែច្នៃនៅចន្លោះខែមករា និងខែសីហា ឆ្នាំ២០២២។
នៅក្នុងរបាយការណ៍របស់មន្ត្រីសេវាសកម្មភាពមីនរបស់អង្គការសហប្រជាជាតិបានបញ្ជាក់ឱ្យដឹងថា ជនរងគ្រោះសរុបមានចំនួន ២៣៩នាក់ ដោយមានអ្នកស្លាប់ ៧២នាក់ និងអ្នករងរបួស ១៦៧ ត្រូវបានស្រង់ទិន្ន័យកាលពីថ្ងៃទី៣១ ខែសីហា។ ចំណែកឯជនរងគ្រោះកាលពីឆ្នាំ២០២១ មានចំនួនសរុប ៤០០នាក់ ដោយមានអ្នកស្លាប់ ១០៣នាក់ និងអ្នករងរបួស
២៩៧នាក់។
របាយការណ៍ដដែលបន្ថែមឱ្យដឹងថា ចំនួនឧប្បត្តិហេតុទាក់ទងនឹងផ្ទុះមីនដែលបានកត់ត្រាចាប់តាំងពីដើមឆ្នាំនេះត្រូវបានគេប៉ាន់ប្រមាណថាមានចំនួន ១៣៤ករណី ខណៈដែលចំនួន ២៤៥ករណីបានកើតឡើងនៅក្នុងឆ្នាំ២០២១។ ការគំរាមកំហែងដោយការបំផ្ទុះនៅតែជាបញ្ហាចម្បងនៅតំបន់កណ្តាលប្រទេសនេះ។ តំបន់ ម៉ូបធី នៅតែជាតំបន់ដែលរងផលប៉ះពាល់ខ្លាំងបំផុតដោយសារគ្រាប់មីនធ្វើដោយដៃ ដោយមាន ៣៧ករណី ត្រូវបានកត់ត្រានៅចន្លោះខែមករា និងខែសីហា។
នៅក្នុងឆ្នាំនេះ ដៃគូក្នុងក្រុមការងារសកម្មភាពមីនមនុស្សធម៌ បានរៀបចំផែនការជំនួយសម្រាប់មនុស្ស ៨២៣ ០០០នាក់ ជាមួយនឹងកញ្ចប់ថវិការ ៣,៤លានដុល្លារអាមេរិក ដែលជាផ្នែកមួយនៃផែនការឆ្លើយតបសម្រាប់ជំនួយមនុស្សធម៌ដែលកំពុងដំណើរការរបស់ពួក។
គួររំលឹកផងដែរថា ប្រទេសម៉ាលីប្រឈមនឹងវិបត្តិសន្តិសុខ នយោបាយ និងសេដ្ឋកិច្ចតាំងពីឆ្នាំ២០១២ ដោយការបះបោរ ការលុកលុយរបស់ក្រុមជីហាដ និងអំពើហិង្សាអន្តរសហគមន៍ ដែលសម្លាប់មនុស្សរាប់ពាន់នាក់ និងបណ្តាលឱ្យមានការផ្លាស់ទីលំនៅរាប់សែននាក់ផ្សេងទៀត នៅក្នុងប្រទេសអាហ្វ្រិកខាងលិច៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៤ ខែកញ្ញា ឆ្នាំ២០២២
