សហរដ្ឋអាមេរិក៖អាជ្ញាធរនិយាយថា យ៉ាងហោចណាស់មនុស្សម្នាក់ត្រូវបានសម្លាប់ ក្រោយពីមានហេតុការណ៍បាញ់ប្រហារកាលពីថ្ងៃពុធនៅឯមន្ទីពេទ្យភាគខាងត្បូងទីក្រុង លីតថល រ៉ក់ ដែលជាទីក្រុងនៅក្នុងរដ្ឋអាក់ខានសាស់ សហរដ្ឋអាមេរិក។
លោក ជេហ្វ ហាហ្កា ប្រធានប៉ូលិសនៅតំបន់ស្ហឺរវ៉ូដបានបញ្ជាក់ឱ្យដឹងថា ជនសង្ស័យម្នាក់ត្រូវបានសមត្ថកិច្ចឃាត់ខ្លួន។ ចំណែកឯផ្លូវ វ៉ីនសិន ណ័ស នៅក្នុងតំបន់ស្ហឺរវ៉ូដ រដ្ឋអាក់ខានសាស់ស្ថិតក្រោមការបិទ ខណៈមន្ត្រីអនុវត្តច្បាប់មកពីភ្នាក់ងារជាច្រើនបានប្រញាប់ប្រញាល់ទៅកន្លែងកើតហេតុដើម្បីឆ្លើយតបទៅនឹងរបាយការណ៍នៃឧប្បត្តិហេតុនៃការបាញ់ប្រហារនោះ។ គេមិនទាន់ដឹងថា មានមនុស្សរងរបួស ឬយ៉ាងណានោះទេ។ ប៉ូលិសមិនបានបញ្ជាក់ថា ជនរងគ្រោះគឺជាអ្នកជំងឺ បុគ្គលិក ឬក៏ភ្ញៀវនោះទេ ។
គួររំលឹកផងដែរថា តំបន់ស្ហឺរវ៉ូដ គឺជាតំបន់ជាយក្រុង លីតថល រ៉ក់ ដែលមានចំនួនប្រជាជនច្រើនជាង ៣២ ៧០០នាក់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៩ ខែកញ្ញា ឆ្នាំ២០២២
