ប្រទេសូម៉ាលី៖កម្លាំងទ័ពជាតិសូម៉ាលីគាំទ្រដោយគាំទ្រដោយក្រុមជីវពលគាំទ្ររដ្ឋាភិបាលក្នុងស្រុក ម៉ាវ៉ាយស្លី កាលពីថ្ងៃព្រហស្បតិ៍បានសម្លាប់ក្រុមសកម្មប្រយុទ្ធ អាល់ស្ហាបាប ៤០នាក់ នៅក្នុងតំបន់ហ៊ីរ៉ាន កណ្តាលប្រទេសូម៉ាលី។
មេបញ្ជាការទ័ពជាតិសូម៉ាលីប្រាប់ភ្នាក់ងារព័ត៌មានសូម៉ាលីថា ក្រុមសកម្មប្រយុទ្ធ ៤០នាក់ ត្រូវបានសម្លាប់អំឡុងពេលប្រយុទ្ធគ្នានៅក្នុងភូមិ សៀល ខាវសល។ អ្នកសារព័ត៌មានស្រង់សម្តីរបស់មេបញ្ជាការមានខ្លឹមសារថា៖ “យើងកំពុងតែស្រាវជ្រាវរកក្រុមសកម្មប្រយុទ្ធជ្រុលនិយម ដែលនៅសេសសល់ ដែលកំពុងតែរត់គេចខ្លួន”។
លោក អេលមី ហាហ្កា ហ្គ័រ ជាអ្នកចាស់ទុំដ៏លេចធ្លោ និងកម្លាំងជាជួរមុខក្នុងការប្រយុទ្ធប្រឆាំងជាមួយក្រុមសកម្មប្រយុទ្ធ អាល់ស្ហាបាប បានស្លាប់ក្នុងអំឡុងពេលប្រយុទ្ធគ្នាយ៉ាងខ្លាំង។ លោក ហាហ្កា គឺជាសសរស្តម្ភដ៏រឹងមាំនៅក្នុងប្រតិបត្តិការវាយលុកប្រឆាំងនឹងក្រុមសម្ព័ន្ធមិត្ត អាល់កៃដា ហើយការខិតខំប្រឹងប្រែងរបស់គាត់បានជួយក្នុងការរំដោះតំបន់មួយចំនួន ដែលស្ថិតនៅក្រោមការគ្រប់គ្រងរបស់ក្រុមសកម្មប្រយុទ្ធ អាល់ ស្ហាបាប នៅក្នុងតំបន់ហ៊ីរ៉ាន។
លោកនាយករដ្ឋមន្ត្រី ហាមហ្សា អាប់ឌី បារ ចាប់តាំងពីពេលនោះមក បានផ្ញើសាររំលែកទុក្ខរបស់គាត់ទៅកាន់ក្រុមគ្រួសារនៃអ្នកបង្កើតសន្តិភាពដែលបានបាត់បង់ជីវិត ដែលជាអ្នកនាំមុខគេក្នុងការប្រយុទ្ធប្រឆាំងនឹងការបះបោរ។ លោកអាប់ឌី និយាយថា៖ “អ្នកបង្កើតសន្តិភាពគឺជាគំរូដ៏ល្អនៃការបះបោរដ៏ជោគជ័យរបស់ប្រជាជនសូម៉ាលីដើម្បីរំដោះខ្លួនចេញពីក្រុមប្រឆាំងសន្តិភាព”។
ភូមិ សៀល ខាវសល គឺស្ថិតក្នុងចំណោមភូមិមួយចំនួនដែលត្រូវបានរំដោះ ក្នុងប្រតិបត្តិការសន្តិសុខនាពេលថ្មីៗនេះនៅភាគខាងត្បូង និងកណ្តាលប្រទេសសូម៉ាលី ដោយកម្លាំងរបស់រដ្ឋាភិបាល និងអ្នកស្រុក។
កាលពីពេលថ្មីៗនេះផងដែរ កម្លាំងរដ្ឋាភិបាលបានបង្កើនការវាយលុកប្រឆាំងនឹងក្រុមសកម្មប្រយុទ្ធ អាល់ ស្ហាបាប ដោយបណ្តេញពួកគេចេញពីអតីតបន្ទាយមួយចំនួន ដែលពួកគេបានកាន់កាប់អស់រយៈពេលច្រើនជាងមួយទសវត្សរ៍។
ក្រុមសកម្មប្រយុទ្ធជ្រុលនិយមនៅតែបន្តគ្រប់គ្រងលើផ្នែកខ្លះនៃជនបទភាគខាងត្បូង និងតំបន់កណ្តាលប្រទេសសូម៉ាលី ហើយបន្តធ្វើការវាយប្រហារកម្រិតខ្ពស់នៅទីក្រុង ម៉ូហ្កាឌីស្យុ រដ្ឋធានីនៃប្រទេសសូម៉ាលី និងកន្លែងផ្សេងៗទៀត៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៣០ ខែកញ្ញា ឆ្នាំ២០២២
