ប្រទេសប៉ាគីស្ថាន៖ប៉ូលិសបាននិយាយកាលពីថ្ងៃអង្គារថា ក្រុមសកម្មប្រយុទ្ធ ៤នាក់ត្រូវបានសម្លាប់ និងបុគ្គលិកសន្តិសុខ ៥នាក់រងរបួសក្នុងហាតុការណ៍ប៉ះទង្គិចគ្នានៅក្នុងខេត្ត ខាយប័រផាកថុនវ៉ា ភាគពាយ័ព្យប្រទេសប៉ាគីស្ថាន។
មន្ត្រីប៉ូលិសជាន់ខ្ពស់នៅតំបន់នោះបានឱ្យដឹងថា ហេតុការណ៍នោះបានកើតឡើងនៅពេលដែលក្រុមភេរវករមួយក្រុមបានវាយប្រហារលើក្បួនរបស់កម្លាំងសន្តិសុខ ជាមួយនឹងមានអាវុធជាច្រើន នៅក្នុងតំបន់មេថានី បណ្តាលឲ្យសន្តិសុខ៥នាក់រងរបួស និងសម្លាប់អ្នកដំណើរនៅនឹងកន្លែង។
មន្ត្រីប៉ូលិសប្រាប់ប្រព័ន្ធផ្សព្វផ្សាយក្នុងតំបន់ថា នៅក្នុងការបាញ់តបតវិញ កម្លាំងសន្តិសុខបានសម្លាប់ក្រុមសកម្មប្រយុទ្ធ ៤នាក់ ចំណែកឯបក្ខពួកជាច្រើននាក់របស់ពួកគេបានរត់គេចខ្លួន។ ប្រតិបត្តិការស្រាវជ្រាវមួយត្រូវបានចាប់ផ្តើមនៅតំបន់ជុំវិញទីនោះដើម្បីចាប់ខ្លួនពួកគេ។
ក្រោយពេលកើតហេតុ កម្លាំងសមត្ថកិច្ចជំនួយបន្ថែម រួមជាមួយនឹងរថពាសដែក បានទៅដល់កន្លែងកើតហេតុ និងបានបិទតំបន់នោះ។
កម្លាំងប៉ូលិសបញ្ជាក់ឱ្យដឹងថា ពួកគេបានរឹបអូសអាវុធ គ្រាប់រំសេវ និងរថយន្តពីក្រុមភេរវករទាំងនោះ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៤ ខែតុលា ឆ្នាំ២០២២
