ប្រទេសតួកគី៖ប្រព័ន្ធផ្សព្វផ្សាយ អ៊ិនធីវី បានរាយការណ៍កាលពីថ្ងៃអង្គារថា ប្រទេសតួកគីបានឃុំខ្លួនមនុស្ស ១០នាក់នៅទីក្រុងអ៊ីស្តង់ប៊ុល ដែលជាប់សង្ស័យលើករណីផ្ទេរប្រាក់ឧបត្ថម្ភទៅដល់ក្រុមសកម្មប្រយុទ្ធរដ្ឋអ៊ីស្លាម (IS)។
ប្រភពដដែលបន្ថែមថា ជនសង្ស័យទាំង ១០នាក់ស្ថិតក្នុងចំណោមបុគ្គល ១២នាក់ដែលអាជ្ញាធរតួកគីតាមចាប់ខ្លួនពីបទធ្វើការងារនៅក្នុងរចនាសម្ព័ន្ធរបស់ក្រុមសកម្មប្រយុទ្ធរដ្ឋអ៊ីស្លាម បន្ទាប់ពីការផ្ទេរប្រាក់ត្រូវបានរកឃើញ។ ប៉ូលិសកំពុងតាមចាប់មនុស្ស ២នាក់ទៀតដែលនៅសល់។
លោក ស៊ូឡីម៉េន សយលូ រដ្ឋមន្ត្រីក្រសួងមហាផ្ទៃ និងមន្ត្រីផ្សេងទៀតក្នុងក្រសួង បានបញ្ជាក់ឱ្យដឹងថា កាលពីពេលថ្មីៗនេះ ប្រទេសតួកគីបានបង្កើនកិច្ចខិតខំប្រឹងប្រែងការពារ និងចាប់ឃុំខ្លួនប្រឆាំងនឹងក្រុមសកម្មប្រយុទ្ធរដ្ឋអ៊ីស្លាម (IS) ដោយយ៉ាងហោចណាស់មានអ្នកបំផ្ទុះគ្រាប់បែកអត្តឃាតចំនួន ១៣នាក់ត្រូវបានឃុំខ្លួនចាប់តាំងពីដើមឆ្នាំ។ ប្រព័ន្ធផ្សព្វផ្សាយក្នុងស្រុកបានរាយការណ៍ថា បន្ថែមលើសពីនេះ យ៉ាងហោចណាស់ទ្រព្យសម្បត្តិប្រមាណជា ៣,៥លានដុល្លារអាមេរិកត្រូវបានស្ទាក់ចាប់ មុនពេលក្រុមសកម្មប្រយុទ្ធរដ្ឋអ៊ីស្លាម (IS) អាចប្រើប្រាស់វាជាមូលនិធិនេះ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៥ ខែតុលា ឆ្នាំ២០២២
