ទាហាននីហ្សេរីយ៉ាសម្លាប់ក្រុមសកម្មប្រយុទ្ធជ្រុលនិយម ១៩នាក់ក្នុងរយៈពេលពីរសប្តាហ៍កន្លងមក

0

ប្រទេសនីហ្សេរីយ៉ា៖មន្ត្រីនិយាយកាលពីថ្ងៃព្រហស្បតិ៍ថា យ៉ាងហោចណាស់ក្រុមសកម្មប្រយុទ្ធជ្រុលនិយម ១៩នាក់ ​ត្រូវបានសម្លាប់ក្នុង​ប្រតិបត្តិការ​ប្រឆាំង​ភេរវកម្ម ​ដោយ​ទាហាន​នៅ​តំបន់​ភាគ​ឦសាន​នៃប្រទេសនីហ្សេរីយ៉ា ក្នុងរយៈពេល ២សប្តាហ៍កន្លងមក។

លោក មូសា ដានម៉ាដាម៉ី អ្នកនាំពាក្យយោធា បានប្រាប់អ្នកយកព័ត៌មាននៅ​សន្និសីទ​សារព័ត៌មាន​ក្នុង​ទីក្រុងអាប៊ុចាថា ការវាយប្រហារតាមអាកាសដោយកម្លាំងទ័ព បានកំណត់គោលដៅទៅលើតំបន់របស់ក្រុមសកម្មប្រយុទ្ធបូកូហារ៉ាម និងក្រុមសកម្មប្រយុទ្ធរដ្ឋអ៊ីស្លាមនៅអាហ្វ្រិកខាងលិច (ISWAP) ក្នុងទីក្រុងកូឡារ៉ាម និងទីក្រុងបូកាមឺរ៉ាម ដែលជាទីក្រុង ២ស្ថិតនៅភាគខាងជើងរដ្ឋបូណូ។

លោក ដានម៉ាដាម៉ី បន្ថែមថា ការវាយប្រហារនោះបានសម្លាប់សមាជិកក្រុមសកម្មប្រយុទ្ធ ១៩នាក់ ហើយសមាជិកក្រុមសកម្មប្រយុទ្ធផ្សេងទៀតបានរត់ចោលគ្នាដោយភាពច្របូកច្របប់។

មន្ត្រីយោធាបាននិយាយថា ជន​ស៊ីវិល​១៤​នាក់ ​ដែលត្រូវ​បាន​ចាប់ខ្លួនយកទៅ​ជំរំ​របស់ក្រុម​សកម្មប្រយុទ្ធ ត្រូវបានជួយសង្គ្រោះក្នុងអំឡុងពេលប្រតិបត្តិការយោធា។ លោក ដាម៉ី បានបញ្ជាក់បន្ថែមឱ្យដឹងថា យ៉ាងហោចណាស់ ក្រុមសកម្មប្រយុទ្ធជ្រុលនិយម ៧៩នាក់ ត្រូវបានចាប់ខ្លួន និងសមាជិកក្រុមសកម្មប្រយុទ្ធច្រើនជាង ៤០០នាក់ រួមទាំងគ្រួសាររបស់ពួកគេ បានលើកទង់សចុះចូលជាមួយកម្លាំងយោធា​ក្នុងអំឡុងពេលប្រតិបត្តិការនោះ។ ក្រុមសកម្មប្រយុទ្ធទាំងនោះនឹងត្រូវបានរាយការណ៍ពី​សកម្មភាព​បន្តបន្ថែម​ទៀត។

គួរបញ្ជាក់ផងដែរថា ក្រុមរដ្ឋអ៊ីស្លាមនៅអាហ្វ្រិកខាងលិច (ISWAP) បានសហការជាមួយក្រុមសកម្មប្រយុទ្ធជិតស្និតបំផុតគឺក្រុមសកម្មប្រយុទ្ធបូកូហារ៉ាម ដើម្បីបង្កើតក្រុមរដ្ឋអ៊ីស្លាមនៅភាគឦសាននៃប្រទេសនីហ្សេរីយ៉ា។ ក្រុម​ភេរវករថែមទាំង​បាន​ពង្រីក​ការ​វាយ​ប្រហារ​របស់ពួកគេទៅ​កាន់​ប្រទេស​ផ្សេង​ទៀត​នៅតំបន់​ឡេកឆាងបាស៊ីន៕

ប្រែសម្រួល៖ប៉ោក លក្ខិណា

ប្រភពព័ត៌មាន Xinhua ចុះផ្សាយថ្ងៃទី០៦ ខែតុលា ឆ្នាំ២០២២

LEAVE A REPLY

Please enter your comment!
Please enter your name here