ប្រទេសនីហ្សេរីយ៉ា៖ប៉ូលិសនីហ្សេរីយ៉ាបាននិយាយកាលពីថ្ងៃចន្ទថា ហេតុការណ៍វាយប្រហារក្នុងព្រះវិហារ នៅកណ្តាលប្រទេសនីហ្សេរីយ៉ាបានសម្លាប់មនុស្ស ២នាក់ និងបង្ករបួសដល់មនុស្សជាច្រើនផ្សេងទៀត។
លោក វីលៀម អូយេ អាយ៉ា អ្នកនាំពាក្យប៉ូលិសរដ្ឋ ឡូហ្គូចា បាននិយាយថា ហេតុការណ៍នេះបានកើតឡើងកាលពីល្ងាចថ្ងៃអាទិត្យ នៅពេលដែលក្មាន់កាំភ្លើងមិនស្គាល់អត្តសញ្ញាណមួយក្រុមបានបាញ់ដោយមិនរើសមុខទៅលើអ្នកថ្វាយបង្គំដែលកំពុងចូលរួមក្នុងកម្មវិធីមួយនៅព្រះវិហារ សេឡេស្ទេលនៃព្រះគ្រីស្ទ នៅក្នុងតំបន់ ហ្វេឡេឡេ នៃរដ្ឋ កូជី។
លោក អូយេ អាយ៉ា បាននិយាយថា ប៉ូលិសបានឆ្លើយទៅនឹងការហៅទូរស័ព្ទបន្ទាន់មួយ ប៉ុន្តែក៏បានរកឃើញអ្នកគោរពបូជាស្ត្រី២នាក់ស្លាប់ និងជាច្រើននាក់ផ្សេងទៀតរងរបួស ដែលស្ថិតនៅក្នុងថ្លុកឈាម។ ខ្មាន់កាំភ្លើងបានរត់គេចចេញពីកន្លែងកើតហេតុ នៅពេលដែលប៉ូលិសបានទៅដល់។
មន្ត្រីប៉ូលិសបាននិយាយថា ពួកគេបានតាមប្រមាញ់អ្នកវាយប្រហារ ហើយចំណែកឯសាកសពជនរងគ្រោះត្រូវបានតម្កល់ទុកនៅទីបញ្ចុះសព ខណៈដែលអ្នករងរបួសកំពុងសម្រាកព្យាបាលនៅមន្ទីរពេទ្យក្បែរនោះ។ សូមបញ្ជាក់ផងដែរថា ពុំទាន់មានការចាប់ខ្លួនណាមួយនៅឡើយទេ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៨ ខែតុលា ឆ្នាំ២០២២
