ប្រទេសអាហ្វហ្គានីស្ថាន៖លោក អាប៊ីដូឡាស់ អាប៊ីឌី អ្នកនាំពាក្យប៉ូលិសខេត្តបាននិយាយថា កម្លាំងសន្តិសុខបានសម្រុកទៅទីតាំងលាក់ខ្លួនដែលគេសង្ស័យថាជាក្រុមភេរវករ ដែស្ហ ឬក្រុមសកម្មប្រយុទ្ធរដ្ឋអ៊ីស្លាម (IS) នៅភាគខាងជើងខេត្តគុណដូស នៃប្រទេសអាហ្វហ្កានីស្ថាន ដោយបានសម្លាប់ក្រុមប៉ះបោរ ៥នាក់ កាលពីថ្ងៃអង្គារ។
លោក អាប៊ីឌី ប្រាប់អ្នកយកព័ត៌មានថា៖ “ដោយផ្អែកលើព័ត៌មានជំនួយ កម្លាំងសន្តិសុខបានសម្រុកចូលទីតាំងលាក់ខ្លួនរបស់ក្រុមខាវ៉ារេច ដែលជាពាក្យដំណាងឱ្យការហៅក្រុមភេរវករដែស្ហ នៅក្នុងតំបន់ ប៉ូលិសឌីស្ទ្រីក២ នៃខេត្តគុណដូស កាលពីព្រឹកនេះ ដោយបានសម្លាប់មនុស្ស៥នាក់នៅកន្លែងកើតហេតុ”។
ក្រុមបះបោរប្រដាប់អាវុធបានលាក់ខ្លួននៅក្នុងផ្ទះដើម្បីបង្កើតបញ្ហាច្បាប់ និងបទបញ្ជានានា ក៏ប៉ុន្តែកម្លាំងសន្តិសុខ បានបំផ្លាញផែនការដ៏កាចសាហាវរបស់ពួកគេមុនពេលមានការអនុវត្តសកម្មភាពណាមួយ។
ប្រភពសារព័ត៌មានក្នុងតំបន់បានរាយការណ៍ថា កាលពីថ្ងៃអាទិត្យ កម្លាំងសន្តិសុខ តាមទាន់ប្រតិបត្តិការរបស់ក្រុមឧទ្ទាមរដ្ឋអ៊ីស្លាមនៅក្នុងទីក្រុងកាប៊ុល។ មន្ត្រីសន្តិសុខបានបញ្ជាក់បន្ថែមថា បុរសដែលត្រូវបានចាប់ខ្លួនបានទទួលខុសត្រូវចំពោះការសម្លាប់មនុស្ស ១៨នាក់នៅក្នុងសកម្មភាពភេរវកម្ម និងធ្លាប់បានប្រើប្រាស់ឈ្មោះជាច្រើនផ្សេងៗគ្នាដើម្បីលាក់បាំងអត្តសញ្ញាណរបស់គាត់។
គួរបញ្ជាក់បន្ថែមផងដែរថា ក្រុមសកម្មប្រយុទ្ធរដ្ឋអ៊ីស្លាមជ្រុលនិយម ដែលធ្លាប់បានអះអាងទទួលខុសត្រូវចំពោះការបំផ្ទុះគ្រាប់បែកដ៏សាហាវមួយចំនួនក្នុងរយៈពេលមួយឆ្នាំកន្លងមកមិនទាន់បានធ្វើការអត្ថាធិប្បាយនៅឡើយទេ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៨ ខែតុលា ឆ្នាំ២០២២
