ប្រទេសសូម៉ាលី៖ប៉ូលិសបាននិយាយថា អ្នកបំផ្ទុះគ្រាប់បែកអត្តឃាតម្នាក់ វាយប្រហារកំណត់គោលដៅលើសណ្ឋាគារល្បីល្បាញមួយកន្លែងនៅទីក្រុង គីសម៉ាយ៉ូ ភាគខាងត្បូងប្រទេសសូម៉ាលី កាលពីថ្ងៃអាទិត្យ។
លោក ម៉ូហាមិដ ណាស៊ី ហ្គូឡិដ ស្នងការរងប៉ូលិសចូបាលេនបាននិយាយថា អ្នកវាយប្រហារបានសម្រុកចូលក្នុងសណ្ឋាគារ ថាវ៉ាកាល ដែលស្ថិតនៅក្នុងទីក្រុងគីសម៉ាយូជាមួយនឹងរថយន្តដែលផ្ទុកសារធាតុផ្ទុះ បង្កការបាញ់គ្នារវាងក្រុមសកម្មប្រយុទ្ធ និងកម្លាំងសន្តិសុខ។
លោក ហ្គូឡិដ ដែលពុំទាន់បានបញ្ជាក់ពីចំនួនជនរងគ្រោះ បានអំពាវនាវឱ្យមានភាពស្ងប់ស្ងាត់ ដោយនិយាយថា កម្លាំងសន្តិសុខនឹងអាចស្តារដំណើរការសណ្ឋាគារបានវិញនៅពេលឆាប់ៗនេះ ដោយនឹងមានវត្តមានរបស់រដ្ឋាភិបាល និងអ្នកនយោបាយជាច្រើន។ លោកបានប្រាប់អ្នកការសែតថា៖“យើងនឹងដោះស្រាយបាននៅពេលឆាប់ៗនេះ ជាមួយក្រុមភេរវករដែលមានសមាជិក ៣នាក់”។ លោកបានបញ្ជាក់ថា មានសិស្សជាច្រើននាក់ស្ថិតនៅក្នុងចំណោមអ្នករងរបួស។
គួររំលឹកផងដែរថា ក្រុមភេរវករ អាល់ ស្ហាបាប ដែលកំពុងប្រយុទ្ធដើម្បីផ្តួលរំលំរដ្ឋាភិបាលដែលគាំទ្រដោយអន្តរជាតិបានអះអាងទទួលខុសត្រូវចំពោះការវាយប្រហារទៅលើសណ្ឋាគារដែលមានការយាមកាមយ៉ាងតឹងតែងនោះ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៤ ខែតុលា ឆ្នាំ២០២២
