ប្រទេសស៊ីរី៖ឯកអគ្គរដ្ឋទូតស៊ីរីប្រចាំនៅប្រទេសលីបង់បាននិយាយកាលពីថ្ងៃអង្គារថា ប្រទេសស៊ីរីបើកចំហរក្នុងការពិភាក្សាអំពីការកំណត់ព្រំដែនសមុទ្រជាមួយប្រទេសលីបង់។
ប្រធានាធិបតីលីបង់ដកស្រង់ប្រសាសន៍របស់លោក អាលី អាបដែល ការ៉ីម ដែលមានខ្លឹមសារថា៖“ទំនាក់ទំនងរវាងប្រទេសស៊ីរី និងប្រទេសលីបង់ គឺបើកចំហរចំពោះគ្រប់បញ្ហាទាំងអស់”។
លោកបានថ្លែងសុន្ទរកថាបន្ទាប់ពីមានជំនួបរបស់លោកនៅវិមាន បាបដា ជាមួយលោកប្រធានាធិបតីនៃប្រទេសលីបង់ ម៊ីជឆែល អោន ដើម្បីពិភាក្សាអំពីការវិវឌ្ឍន៍ចុងក្រោយបង្អស់លើការបោះបង្គោលព្រំដែនសមុទ្រ និងបញ្ហាទាក់ទងនឹងជនភៀសខ្លួនរបស់ប្រទេសស៊ីរីនៅ ប្រទេសលីបង់។
លោកឯកអគ្គរដ្ឋទូតបាននិយាយថា៖ “សន្ធិសញ្ញាភាពជាបងប្អូន និងកិច្ចសហប្រតិបត្តិការគ្នា កើតមានរវាងប្រទេសទាំងពីរ ហើយប្រទេសស៊ីរីតែងតែប្តេជ្ញាចិត្តចំពោះរឿងនេះ សូម្បីតែក្នុងបញ្ហាដែលមិនទាន់ដោះស្រាយក៏ដោយ។”
ជម្លោះរវាងប្រទេសលីបង់ និងប្រទេសស៊ីរីជុំវិញបញ្ហាព្រំដែនសមុទ្របានកើតឡើងកាលពីឆ្នាំមុន បន្ទាប់ពីប្រទេសស៊ីរីបានផ្តល់អាជ្ញាប័ណ្ណដល់ក្រុមហ៊ុនថាមពលរុស្ស៊ី ដើម្បីចាប់ផ្តើមធ្វើការ
រុករកប្រេង និងឧស្ម័ននៅក្នុងតំបន់ដែលទាមទារដោយប្រទេសលីបង់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៦ ខែតុលា ឆ្នាំ២០២២
