ប្រទេសប៉ាគីស្ថាន៖កម្លាំងយោធានិយាយកាលពីថ្ងៃសៅរ៍ថា កម្លាំងសន្តិសុខ២នាក់ ត្រូវបានសម្លាប់ក្នុងហេតុការណ៍ប៉ះទង្គិចគ្នារវាងកម្លាំងសន្តិសុខ និងក្រុមភេរវករ នៅក្នុងស្រុក ដឺរ៉ាអ៊ីសម៉េល ខាន នៅខេត្តខាយប័រផាកថុនវ៉ា ភាគនិរតីនៃប្រទេសប៉ាគីស្ថាន។
បណ្តាញទំនាក់ទំនងសាធារណៈអន្តរសេវាកម្មហៅកាត់ថា (ISPR) បានលើកឡើងនៅក្នុងសេចក្តីថ្លែងការណ៍មួយថា ការបាញ់គ្នាបានកើតឡើងរវាងកម្លាំងទ័ព និងក្រុមភេរវករ នៅក្នុងតំបន់ដារ៉ាហ្សីនដា។ បណ្តាញទំនាក់ទំនងសាធារណៈអន្តរសេវាកម្មនិយាយថា៖ “កងទ័ពរបស់ពួកគេបានចូលរួមយ៉ាងមានប្រសិទ្ធភាពលើទីតាំងរបស់ក្រុមភេរវករ។ ទោះជាយ៉ាងណាក៏ដោយ ក្នុងអំឡុងពេលបាញ់គ្នា បុគ្គលិកសន្តិសុខ២នាក់បានស្លាប់”។
ប្រភពដដែលបន្ថែមថា បុគ្គលិកសន្តិសុខដែលស្លាប់នោះមានបុរស អាយុ ៣៣ឆ្នាំ រស់នៅក្នុងស្រុក ខូស្ហាប នៅខេត្តផុនចាប ភាគខាងកើតនៃប្រទេស និងបុរសម្នាក់ទៀតអាយុ ២៦ឆ្នាំមកពីស្រុកអាថុក។ ប្រតិបត្តិការសម្អាតត្រូវបានធ្វើឡើងដើម្បីលុបបំបាត់វត្តមានរបស់ក្រុមភេរវករនៅក្នុងតំបន់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៣០ ខែតុលា ឆ្នាំ២០២២
