កាលពីថ្ងៃអង្គារនេះកងកម្លាំងអ៊ីរ៉ាក់បានចាប់ខ្លួនស្ត្រីរដ្ឋអ៊ីស្លាម (IS) ម្នាក់នៅទីក្រុងម៉ូស៊ុល (Mosul) ប្រទេសអ៊ីរ៉ាក់ ជាមួយនឹងឯកសារដែលជាកម្មសិទ្ធិរបស់ក្រុមជីហាដក៏បានរឹបអូសផងដែរ។
ប្រភពពីប៉ូលិសខេត្តនីនីវេ (Ninevah) បានប្រាប់សារព័ត៌មាន BasNews ថាកងកម្លាំងសន្តិសុខអ៊ីរ៉ាក់ផ្អែកលើព័ត៌មានចារកម្ម បានចាប់ខ្លួនស្ត្រីរដ្ឋអ៊ីស្លាមម្នាក់ស្ថិតនៅក្នុងហាងទូរស័ព្ទមួយកន្លែងដែលនាងត្រូវបានគេរាយការណ៍ថាកំពុងរង់ចាំមនុស្សម្នាក់។
កងកម្លាំងសន្តិសុខបានរឹបអូសត្រា ឯកសារ និងឯកសារផ្ទាល់ខ្លួន ហើយបាននាំស្ត្រីរដ្ឋអ៊ីស្លាមរូបនេះទៅកាន់ទីស្នាក់ការប៉ូលិស ដើម្បីស៊ើបអង្កេត និងបញ្ជូនទៅកាន់តុលាការអ៊ីរ៉ាក់។
ហេតុការណ៍នេះបានកើតឡើងមួយថ្ងៃបន្ទាប់ពីសមាជិករដ្ឋអ៊ីស្លាមដ៏លេចធ្លោ៣នាក់ត្រូវបានចាប់ខ្លួនក្នុងខេត្តមានជម្លោះកឺកុក (Kirkuk)។
គួរបញ្ជាក់ថា ក្រុមរដ្ឋអ៊ីស្លាមត្រូវបានប្រកាសថាចាញ់ទាំងស្រុងនៅក្នុងប្រទេសអ៊ីរ៉ាក់កាលពីឆ្នាំ២០១៧ ប៉ុន្តែក្រុមនេះនៅតែបន្តសកម្មនៅក្នុងតំបន់ផ្សេងៗគ្នានៃប្រទេសនេះ ដែលជាហេតុបង្កការគំរាមកំហែងយ៉ាងធ្ងន់ធ្ងរដល់ជនស៊ីវិលនិងកងកម្លាំងសន្តិសុខ។
អ្នកប្រែសម្រួល៖ គល់ សេងហាក់
ប្រភពព័ត៌មានពី basnews ចេញផ្សាយថ្ងៃទី២ ខែវិច្ឆិកា ឆ្នាំ២០២២
