ប្រទេសតួកគី៖ មន្ត្រីក្រសួងការពារជាតិតួកគីបាននិយាយថា កម្លាំងតួកគីបានធ្វើប្រតិបត្តិការតាមអាកាសកាលពីព្រឹកថ្ងៃអាទិត្យដើម្បីប្រឆាំងនឹងសមាជិករបស់អង្គភាពការពារប្រជាជនឃឺដស៊ីរី (YPG) ៤នាក់ នៅភាគខាងជើងប្រទេសស៊ីរី និងគណបក្សពលករឃឺដ (PKK) ខុសច្បាប់នៅភាគខាងជើងប្រទេសអ៊ីរ៉ាក់។
មន្ត្រីក្រសួងបានលើកឡើងនៅក្នុងសេចក្តីថ្លែងការណ៍មានខ្លឹមសារថា ប្រតិបត្តិការតាមអាកាស ខ្ល ស្វដ (Claw-Sword) ត្រូវបានធ្វើឡើងនៅក្នុងតំបន់ដែលគេបានប្រើជាមូលដ្ឋានដើម្បីវាយប្រហារលើកម្លាំងតួកគី និងដើម្បីការពារខ្លួនស្របតាមមាត្រា ៥១ នៃធម្មនុញ្ញអង្គការសហប្រជាជាតិ។ ក្រសួងបានផុសលើបណ្តាញសង្គមទ្វីតធ័រមានខ្លឹមសារថា៖ “វាជាពេលវេលាសម្រាប់ការពិចារណា។ ក្រុមភេរវករត្រូវទទួលខុសត្រូវចំពោះការវាយប្រហារទាំងអស់ ”។
ប្រតិបត្តិការនោះត្រូវបានធ្វើឡើង បន្ទាប់ពីមានហេតុការណ៍វាយប្រហារសម្លាប់នៅក្នុងទីក្រុងអ៊ីស្តង់ប៊ុល ដែលបានសម្លាប់មនុស្សយ៉ាងហោចណាស់ ៦នាក់ និងបណ្តាលឱ្យមនុស្ស ៨១នាក់រងរបួស។ ប៉ូលិសតួកគីបាននិយាយថា ពួកគេបានឃុំខ្លួនស្ត្រីជនជាតិស៊ីរីម្នាក់ដែលមានឈ្មោះថា អាឡា អាល់បាស្ហៀរ ដែលបានសារភាពថា បានទទួលបញ្ជាធ្វើការវាយប្រហារពីអង្គភាពការពារប្រជាជនឃឺដស៊ីរី (YPG)។
គួរបញ្ជាក់ផងដែរថា ទីក្រុងអង់ការ៉ាបានចាត់ទុក អង្គភាពការពារប្រជាជនឃឺដស៊ីរី (YPG) ជាសាខារបស់គណបក្សពលករឃឺដ (PKK) ខុសច្បាប់នៅក្នុងប្រទេសស៊ីរី។
គួររំលឹកផងដែរថា គណបក្សពលករឃឺដ(PKK) ដែលត្រូវបានចាត់ទុកថាជាអង្គភាពភេរវករដោយប្រទេសតួកគី សហរដ្ឋអាមេរិក និងសហភាពអ៊ឺរ៉ុប បានធ្វើការបះបោរប្រឆាំងនឹងរដ្ឋាភិបាលតួកគីអស់រយៈពេលជាងបីទសវត្សរ៍មកហើយ ហើយថែមទាំងបានសម្លាប់មនុស្សច្រើនជាង៤០ ០០០ នាក់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២០ ខែវិច្ឆិកា ឆ្នាំ២០២២
