ប្រទេសយេម៉ែន៖មន្ត្រីសន្តិសុខបានប្រាប់អ្នកយកព័ត៌មានថា យ៉ាងហោចណាស់សមាជិក៥នាក់របស់កម្លាំងរដ្ឋាភិបាលយេម៉ែន ត្រូវបានសម្លាប់កាលពីថ្ងៃសៅរ៍ ក្នុងហេតុការណ៍បំផ្ទុះគ្រាប់បែក នៅខេត្តស្ហាបវ៉ាដែលជាខេត្តសម្បូរប្រេង នៅភាគខាងត្បូងនៃប្រទេសយេម៉ែន។
មន្ត្រីសន្តិសុខក្នុងតំបន់បាននិយាយក្នុងលក្ខណ្ឌអនាមិកថា៖ “ក្មាន់កាំភ្លើង ដែលសង្ស័យថាជាក្រុមសកម្មប្រយុទ្ធអាល់កៃដា បានវាយប្រហារកំណត់គោលដៅលើរថយន្តរបស់កម្លាំងរដ្ឋាភិបាល ដោយប្រើឧបករណ៍បំផ្ទុះកែច្នៃ នៅភាគខាងលិចនៃខេត្តស្ហាបវ៉ា បង្កឱ្យមានការផ្ទុះដ៏កក្រើកនៅក្នុងតំបន់ដែលស្ថិតនៅក្បែរតំបន់អណ្តូងប្រេង ”។
មន្ត្រីរូបនោះបានបញ្ជាក់បន្ថែមថា ទាហានសរុប ៥នាក់ រាប់បញ្ជូលទាំងមន្ត្រីជាន់ខ្ពស់ម្នាក់ ត្រូវបានសម្លាប់ និងទាហានមួយចំនួនផ្សេងទៀតរងរបួសនៅក្នុងការវាយប្រហារនោះ។
ប្រភពបន្ថែមថា ហេតុការណ៍បំផ្ទុះគ្រាប់បែកបានបំផ្លាញរថយន្តយោធារបស់ទាហានការពារខេត្តស្ហាបវ៉ា ដែលទើបតែរើសចូលថ្មី ដោយភាគច្រើនជាទាហានគាំទ្រដោយកម្លាំងចម្រុះដឹកនាំដោយប្រទេសអារ៉ាប៊ីសាអូឌីត។
ក្រុមប្រឹក្សាអន្តរកាលភាគខាងត្បូង ហៅកាត់ថា (STC) ដែលមានមូលដ្ឋាននៅទីក្រុងអាដែន បានលើកឡើងនៅក្នុងសេចក្តីថ្លែងការណ៍ខ្លីមួយថា កម្លាំងរបស់ពួកគេបានដោះគ្រឿងផ្ទុះមួយទៀតចោលនៅក្នុងខេត្តស្ហាបវ៉ា។ ការវាយប្រហារ ដែលធ្វើឡើងដោយក្រុមសកម្មប្រយុទ្ធប្រឆាំងនឹងកម្លាំងទ័ពភាគខាងត្បូងដែលគាំទ្រដល់រដ្ឋាភិបាល មានការកើនឡើងនៅក្នុងតំបន់ផ្សេងៗគ្នាជាច្រើននៃប្រទេសយេម៉ែន ក្នុងរយៈពេលត្រឹមតែ ២ខែ ក្រោយពីថ្ងៃផុតកំណត់នៃបទឈប់បាញ់ដែលតំណាងដោយអង្គការសហប្រជាជាតិនៅថ្ងៃទី២ ខែតុលា។
ការវាយប្រហារភេរវករ កើតឡើងខណៈដែលកម្លាំងរដ្ឋាភិបាលយេម៉ែនគាំទ្រដោយកម្លាំងចម្រុះដឹកនាំដោយប្រទេសអារ៉ាប៊ីសាអូឌីតកំពុងតែវាយប្រហារជាបណ្តើរៗទៅលើទីតាំងលាក់ខ្លួនរបស់សាខាក្រុមសកម្មប្រយុទ្ធអាល់កៃដាដែលមានមូលដ្ឋាននៅយេម៉ែន ដែលភាគច្រើនស្ថិតនៅតំបន់ភ្នំនៃខេត្តស្ហាបវ៉ា និងខេត្តក្បែរៗគ្នា។
គួរបញ្ជាក់ផងដែរថា បណ្តាញក្រុមសកម្មប្រយុទ្ធអាល់កៃដាដែលមានមូលដ្ឋាននៅប្រទេសយេម៉ែននៅឧបទ្វីបអារ៉ាប់ ដែលហៅកាត់ថា (AQAP) បានអះអាងទទួលខុសត្រូវចំពោះការវាយប្រហារធំៗជាច្រើនលើកប្រឆាំងនឹងកម្លាំងសន្តិសុខនៅខេត្តមួយចំនួន ភាគខាងត្បូងនៃទេសយេម៉ែន។ មកទល់ពេលនេះ ឧបទ្វីបអារ៉ាប់បានទាញយកផលប្រយោជន៍ជាច្រើនឆ្នាំនៃជម្លោះដ៏សាហាវរវាងរដ្ឋាភិបាលប្រទេសយេម៉ែន និងក្រុមឧទ្ទាមហ៊ូធី ដើម្បីពង្រីកវត្តមានកម្លាំងរបស់ពួកគេនៅក្នុងប្រទេសអារ៉ាប់ដែលរងការបំផ្លិចបំផ្លាញដោយសង្គ្រាម៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៧ ខែវិច្ឆិកា ឆ្នាំ២០២២
